Hmahruaitu ni chungin Egypt an tlang

Egypt chuan Africa Cup of Nations khelh mekah Nilaini zan khan an group match hnuhnung ber khelin Ghana 1-0 in an hneh a, quarterfinal an lut. Group D inkhel dangah Uganda leh Mali te 1-1 in an inhnehtawk ve bawk.

Stade de Port-Gentil, Gabon-a inkhelah Egypt tan Mohamed Salah chuan minute 11-na lekah he inkhela goal awm chhun chu free kick aṭangin a khung a, Chelsea forward hlui Salah chiah hi tun tournament kal meka Ghana lam goal khung thei a la ni rih.

Pathianni zanah quarterfinal khelh tur niin vawi sarih champion tawh Egypt hian Morocco an hma­chhawn ang. Ghana hi an league stage match hnuhnung berah chak lo mah se an match hmasa lamah Mali leh Uganda te an lo hneh tawh avangin an tlang tho a, DR Congo an hmachhawn zui leh leh bawk dawn a ni.

Kum 1978 hnua Africa Cup of Nations-a goal la khung leh lo Uganda tan Farouk Miya chuan goal khung mah se Mali tan Yves Bissouma chuan free kick aṭangin a sut a, goal dang a luh zui loh avangin point khat ve veah an lungawi a ngai.