Monaco damna Falcao

Nilaini zan khan Radamel Falcao goal khat khung hmangin AS Monaco chuan Nancy hnehin French Cup final an lut a, April ni 1 khian champion lai Paris Saint-Germain nen nomawi an la inchuh leh dawn.

Stade Louis II-a inkhel­ah Nancy goal­keeper Guy N'Dy Assembe tihsual nang­chingtu Falcao hian first half-ah he inkhela goal awmchhun hi a khung. Monaco hian tun season-ah an khelmual hi an hmangthiam hle a, inelna hrang hrangah vawi khat chiah chak loh an la nei.

Manchester United leh Chelsea tan pawha khel tawh Falcao hi French club tana a inlan hnuah a khel ṭha tluang hle a, tun season inelna hrang hrangah match 21 a khelh aṭangin goal 17 a khung tawh. A club chu French Ligue 1-ah point 48 hmuhpui tawhin hmahruaitu an ni a, Pathianni zanah league lama an elpui PSG an lenchilh ang.