Milan hnehin Juve an tlang
Juventus chuan Paulo Dybala leh Miralem Pjanic te goal khung hmangin AC Milan 2-1 in an hneh. Turin club hian Coppa Italia semifinal lutin Napoli nen an inhmachhawn leh ang.
Nilaini zan Juventus Stadium-a inkhelah champion lai Juve an che fuh hmasa zawk. Ṭan aṭanga minute 10-na lekah Juan Cuadrado pass fing tak dawngtu Dybala chuan goal hmahruai a khung. Argentine forward hian tun season-ah a club tan goal riat a khung tawh.
Massimiliano Allegri enkawlna hnuaia Serie A hmahruai mektu Juventus an hlauhawm chhunzawm zel a, Miralem Pjanic chuan minute 21-naah free kick aṭanga an goal hnihna khungin a team chu hmun himah a hruai.
Serie A chauh ni lo, European competition thleng pawh a sulhnu nei ṭha Milan an beidawng mai bik lo. Second half-ah Colombian forward Carlos Bacca volley luh hmangin an si phurh an sut ṭhen a, minute 53-naa an goal khung vang hian an beiseina a nung thar.
Mahse, Milan defender Manuel Locatelli chuan goal an khung a-ṭanga minute khat liam hnu lekah a yellow card pahnihn a hmuh avangin hnawhchhuah a ni a, Vincenzo Montella enkawl Milan an tho zo tawh lo.
Tun season Serie A-ah Milan hian 1-0 in Juve hi an lo hneh tawh a, thla hmasa khan Italian Super Cup chawi turin penalty-ah Turin club bawk hi an lo hneh tawh, tun ṭumah erawh result a danglam ta a ni.
Milan coach Montella chuan, "Second half-a kan khelh dan ang kha chuan eng team pawh kan hneh thei ang, chutihrualin hnehna chang tur chuan minute 90 chhung khelh ṭhat a ngai tih kan hriat a pawimawh. A nihna takah chuan Juventus hi kan la phak lo hle a, team ṭha ni turin kan indin chho ve mek zel - kawng dik kan zawh avangin result ṭha kan nei thuai ang," a ti.
Juve coach Allegri chuan, "Hun rei tak chhung player 10 leh 11 ni chungin kan khel a, goal khung belh ngei tur kan ni. Kan tlarhma lama awmte an hriam tawk lo a, chutihrualin kan zavai mai khan kan theihna zawng zawng kan hlan tawk loin ka hria. Semnifinal kan lut a, a lawmawm hle, Napoli paltlang tur chuan kan khelhṭhat zual a ngai tawh ang," tiin a sawi.