De Bruyne hoin Man City-in champion an hnaih
Wolverhampton Wanderers lakah Kevin de Bruyne-a'n goal li ngawt a khung a, Nilaini zan Premier League inkhelah Manchester City-in 5-1 in hnehna an chang. Pep Guardiola hoten league match hnih khelh hmabak la awmah point thumin hma an hruai a, goal difference-ah pawh pahnihna Liverpool aiin goal sarihin an ṭha zawk.
Man City-in West Ham leh Aston Villa an la hmachhawn dawn a, champion chiang turin point li chiah a ngai tawh. Pep Guardiola hote hian season nga chhungin league nomawi vawi li an chawi dawn tihna a ni a, Sir Alex Ferguson-a'n Manchester United enkawl hna a chawlhsan hnua English club ṭha ber tiha chhal theih an ni.
KDB Show
Molineux Stadium-ah Man City-in an thiamzia an pholang a, a changtupa chu Belgian tlangval Kevin de Bruyne a ni. Minute sarihna lelah De Bruyne leh Bernardo Silva ten Wolves tlarhnung ṭhiatin Belgian midfielder hian cool zetin goal hmahruai a khung.
Mikhual team hian goal nawr chhunzawm mah se mualneitu lamin ṭha zetin an vaw let. Minute 11-naah Raul Jimenez-a'n tlarhmaa a kawppui Pedro Neto ball a pe a, Neto hian veilam aṭanga cross lutin Leander Dendoncker-a'n a tawp a khar.
Wolves lawm chhung a rei lo, minute 16-naah De Bruyne ball pek luh chu Raheem Sterling tan na hret mah se keeper Jose Sa tana laklawh chiah avangin a ti per, hemi per hi KDB-a'n chiang takin a khung. Beligan midfielder De Bruyne a phur chho zel a, minute 24-naah mual dinglam aṭanga khalh lutin box pawn aṭangin goal kilah kawh zetin a pet lut a, goal 'class' bik a ni.
De Bruyne tan zan duhawm a ni a, minute 60-naah Phil Foden-a ball pass chu a goal li nan a khung. Belgian mifielder thawh hlawkzia nemnghettu chu Foden-a ball petu pawh hi amah tho a ni a, Wolves player-ten dan ngaihna an hre lo.
Man City-in an nawr chhunzawm a, KDB hian amah siamsaktu Foden tan ball ṭha bik pe mah se English midfielder hian goal ban pet per nan a hmang. Mikhual team-in minute 84-naah goal ngana an khung a, Jaoa Cancelo shot-cross chu Wolves defender-in a khawih per zarah Sterling-a'n awlsam takin a khung.
De Bruyne-a'n goal nga khung theihna remchang a nei a, Belgian midfielder hian goal ban a pet per. Goal dang a luh belh tawh lo a, inkhel thununtu Man City 5-1 in an chak.
Tlarhnung buaina
Man City goal bawh a na a, goal nga ngawt an khung. Pep Guardiola hoten inkhel thunun viau mah se goal an chhuah tho a, an tlarhnung a phui tawk lo. City hian hliam vangin Ruben Dias, John Stones leh Kyle Walker te an chhawr thei lo a, Nathan Ake a fitness a ṭhat tawk loh bawk avangin Wolves lakah pawh hian defence laiah Aymertic Laporte leh midfielder Fernandinho te an inkawp.
Molineux Stadium-ah City-in point thum an hlawh chhuak a, chutihrualin Laporte leh Fernandinho te chu inhliam vangin an la chhuak. Tuna an khelh dan thlir chuan City chelh rual an ni lo a, amaherawhchu an tlarhnung khi tawh sa hi a khik belh a nih chuan Hammers leh Villa an hmachhawn hunah hna a awlsam lo ang.
Pep a lawm
Man City manager Pep Guardiola chuan, "Tun hnai ni chuang loin amah nen hian kan inkawm fo a, box chhungah goal khung tura lut hnem turin ka chah. Hemi kawngah hian tun season-ah hma a sawn nasa a, tun season chauh ni loin a career chhung zawngin a chhunzawm theih ka beisei. A hma chuan ṭhiante siam kha nuam a ti a, tunah chuan goal khung nawmna a pawh tawhin ka hria," tiin goal li khungtu De Bruyne a fak.
Citizens goal bawh a na a, tun hnaiah Borussia Dortmund aṭangin Erling Halaand an lakluh tur thu an puang bawk. Pep chuan, "Goal khung kawngah chuan min pui ngei ang. Amaherawhchu goal khung ringawt hi a ni lo a, a tawpah chuan chak a pawimawh. Ka thlirnaah chuan goal kan venhim ṭhat leh ṭhat loh hi defender laiah ka ngai lo a, chutiang chiah chuan goal kan khung tam leh tam loh hi striker vangah ka ngai lo," tiin team anga ṭan ho ṭulzia a sawi lang.
Spanish manager chuan sawi chhunzawmin, "Goal ṭhahnem tak a khung tawh a, kan team-ah chuan goal a khung theih nan kan pui ang. Chutihrualin goal khung turin mawhphurhna ka pe lian bik dawn lo. Chak kan duh a, chak tur chuan player tinin ṭha taka an khelh vek a ṭul. A theihna a nei anga kan hriat nena Man City hi a rawn zawm a nih chuan result ṭha zawk min neihpui thei ang,' tiin Haaland chungchang a sawi.