Ten Hag-a'n Ajax a champion pui

Erik ten Hag kaihhruai Ajax-in match khat khelh hmabak nei chungin Eredivisie-ah an champion. Ajax hian champion nenmnghet turin Nilaini zan khan Johan Cruyff Arena-ah Heerenveen chu 5-0 in an sawp.

Ajax tan hian Nicolas Tagliafico, Steven Berghuis, Sebastien Haller, Brian Brobbey leh Edson Alvarez ten goal khat ṭheuh an khung. Dutch club hian Ten Hag hnuaia match hnuhnung ber chu May 15, Pathianni zan hian an khel dawn a, Vitesse an hmachhawn ang.

Ten Hag-a hote hian match 33 aṭangin point 82 an hmu a, inkhel dangah PSV Eindhoven-in NEC 3-2 in hneh mah se an inkarah point li a awm tawh avangin champion a chiang tawh. Kum 52 mi Dutch manager hian December 21, 2017 aṭangin Ajax hi a enkawl ṭan a, season tluana season li chhung a enkawl ṭumah pakhatna nih pui vek. Chutihrualin 2019-20 season erawh Covid-19 vanga inkhelh zawh a nih loh avangin champion-a chhiar an ni lo thung.

Ajax hian Ten Hag hnuaiah Eredivisie vawi thum an champion a, KNVB Cup-ah vawi thum final lutin vawi hnih an champion. Tun season Dutch Cup final-ah Ajax hian PSV Eindhoven chu 2-1 in an hneh lo.

April thla khan Man United chuan season thar atan Ten Hag an lakluh thu an puang a, Dutch manager hian kum thum daih contract a ziak a, kum khat pawhsei theih dan a awm bawk. Kum 2013-a Sir Alex Ferguson-a'n manager hna a chawlhsan hnua Man United-in manager nghet panga an neihna a ni.