FA Youth Cup champion Man United

Manchester United chu kum 2011 hnua a vawi khat nan FA Youth Cup-ah an champion a, Nilaini zan final hmuhnawm takah Nottingham Forest 3-1 in an hneh. Old Trafford-ah entu mipui 67,492 an pungkhawm a, FA Youth Cup final-a entu tam ber ṭum niin kum 2007 final-a entu zat mi 30,000 aiin an letin an tam.

Man United hian captain Rhys Bennett tauh luh hmangin minute 13-naah hma an hruai a, Forest-in keeper Radek Vitek chetsual vangin minute 43-naah Joshua Powell hmangin siphurh an sut. Second half-ah Argentine rawlthar Alejandro Garnacho a che ṭha.

Kum 17 mi Garnacho hian minute 78-naah a penalty hlawhchhuah chu goal-ah a chantir a, Cristiano Ronaldo goal khung lawm dan angin a goal khung hi a lawm a, a ṭhiante leh mipuiin an 'siuuu' pui bawk.

Injury time-ah Atletico Madrid aṭanga Man United zawmtu Garnacho hian goal ṭha bik a khung leh bawk. Garnacho hi senior team tan ṭum khat a inlan tawh a, Argentina tana khel turin koh ni tawh mah se La Albiceleste senior team tan erawh a la inlan lo.

Youth Cup final hi United boss hlui Sir Alex Ferguson bakah tuna first team player ni lai Bruno Fernandes, David de Gea leh Harry Maguire ten an en. Kum 2011-a Man United champion ṭum khan Jesse Lingard leh Paul Pogba te chu player pawimawh an ni a, tun ṭuma player pawimawhte hi senior team-ah an lut chho thei ang em tih chu hunin a hril ang.