Aizawlah BFI-INBL 3X3 Season 1

Olympic inelna 3x3 basketball a tel tawh avangin Basketball Federartion of India (BFI) chuan inelna mumal zawk a duang a, a hming atan BFI-Indian National Basketball League 3x3 a vuah. Inelna hi India ram khawpui 20-ah khelh tur a ni a, khawpui thlan zingah Aizawl a tel.

Aizawl bika BFI-INBL 3X3 Season 1 inelna hi vawiin aṭangin Hawla Indoor Stadium, Republic Vengthlangah khelh a ni dawn a, ni hnih awh tur a ni ang. Mipa leh hmeichhe inelna bakah kum 18 hnuai lam mipa leh hmeichhe inelna siam a ni a, category pali a awm tihna a ni.

BFI-INBL 3X3-ah hian tu tan pawh tel theih a ni a, Federation Internationale de Basketball (FIBA) 3X3 Event Registration nen inthlunzawm vekin tuna player tel zawng zawngte hi FIBA 3X3 World Ranking pek an ni nghal vek dawn.

Aizawl inelna bika tel turte hi Mizo player-te an ni a, tun dinhmunah state pawn aṭanga tel an awm hriat a ni lo. Chutihrualin India ram champion ni tur chuan hmabak a la hautak hle. Khawpui 20 ṭheuha champion hian May 27-29, 2022 chhungin Bengaluru-ah India ram champion an zawng ang.