Delhi tan Marsh leh Warner

Indian Premier League-ah Delhi Capitals chuan Nilaini zan khan Rajasthan Royals chu wicket riatin an hneh. Rajasthan hian bat hmasain 160/6 runs an siam a, David Warner (52*) leh Mitchell Marsh (89) te hmangin Delhi hian over 18.1-ah 161/2 runs in an chhanglet.

Navi Mumbai-a inkhelah Delhi-in vawm hmasak an thlang. Royals tan Ravichandran Ashwin (50) leh Devdutt Padikkal (48) te an che ṭha a, 160 runs an siam. Rajasthan hian target pangngai tak chhawp mah se player of the match-a thlan Marsh-a'n ball 62 lekah 89 runs a vaw chhuak a, Delhi hian ball sarih dah bangin 161 runs an siam a, wicket riatin an chak.

IPL khelh mekah match khelh tur a tam tawh lo a, chutichung chuan Gujarat Titans chauhin playoff khel turin an tling a, Mumbai Indians chiahin playoff khelh beiseina an nei tawh lo. Club pariatin hmun ruak pathum an inchuh a, boruak a 'hot' chho hle. Zanin dar 7:30 hian Royal Challengers Bangalore leh Punjab Kings te an inkhel leh ang.