Juve hnehin Inter Milan an champion

Inter Milan chuan extra time khelh hnuah Juventus 4-2 in an hneh a, an phu ang ngeiin Coppa Italia nomawi chu a vawi riat nan an chawi - kum 2011 hnu lama an champion lehna hmasa a nih avangin an lawmna a zual.

Stadio Olimpico, Rome-a inkhelah Old Lady tan Alex Sandro leh Dusan Vlahovic ten goal an khung. Inter lamin Ivan Perisic-a goal hnih bakah Nicolo Barella leh Hakan Calhanoglu-a te goal an chakpui thung.

Chak lo Juve hian tun season-ah nomawi an chawi dawn lo, vawi 14 an champion tawhnaah an hlawhtlin loh avang hian 2010-11 hnua a vawi khat nan nomawi engmah chawi loin season an khar a ngai dawn.

Boruak inthlak
Nilaini zan final a hmuhnawm, minute rukna lekah Barella chuan box pawn aṭangin mawi zetin a thlawh lut, defender ten tauh tum mah se an tauh phak lo, keeper Mattia Perin tan dan phak a ni lo.

Vlahovic leh Paulo Dybala ten chhanlet tum mah se Inter keeper Samir Handanovic a chesual duh lo, chawlhlawk laiin Inter hi 1-0 in an chungnung, second half tirah erawh Old Lady an tal na hle.

Alex Sandro-a shot chu Handanovic-a'n a chhut sual a, holam angreng takin a chhuah. Goal luh aṭanga minute hnih lekah Vlahovic a inlar zui, a shot hmasa lo dansak mah se a per let chu rang takin a khung.

A tawpah erawh Simone Inzaghi naute chu a vannei zawk an ni. Hun tawp dawnah Lautaro Martinez-a penalty hlawchhuah chu sawisel boin Calhanoglu-a'n a sut, extra time chu Perisic ta a ni - penalty a khung bakah goal mawi hmangin chak a nemnghet.

Beidawng ngai lo
Inter Milan manager Simone Inzaghi chuan a naute chu an beidawn ve ngai loh thu a sawi, si an phurh lai pawhin Nerazzurri hi an chiai hran lo, a tawpah chuan an beidawn duh loh rah an seng leh ta zawk.

Inzaghi chuan, "Team ṭha tak lakah kan khel a hmuhnawm a, match ṭha tak kan khel. Ka naute hi ka chhuanna em em chu an huaisen a, an beidawng ve ngai lo hi a ni, hlawhtling tur chuan hetiang rilru hi put a ngai ṭhin.

"Serie A lamah pawh khelh hmabak pahnih kan la nei, heng inkhelah hian kan theihna zawng zawng kan hlan zui ang. Coppa Italia kan lak hian inrintawkna kan neihsa pawh a belh chhah ngei ang," tiin a sawi.

Inter hian Serie A table-ah AC Milan chu point hnihin an phak lo, khelh hmabak pahnih ve ve an la nei. Champion nomawi humhim tur chuan Milan chetsual an chan a ngai tawh, an khingpui pahnih hneh chu an tih tur a ni ang.