Mangṭha Giorgio Chiellini

Italy defender Giorgio Chiellini chuan tun season tawp rualin Juventus a chhuahsan tur thu a sawi chiang. Kum 17 chhung a chamchilh tawh club tana a season hnuhnung berah nomawi a chawi lo tur hi a ui khawp ang.

Kum 37 mi Chiellini hian 2005 khan Fiorentina aṭangin Juve hi a zawm, a zawna Serie A nomawi vawi kua an chawiah khan a tel vek. League nomawi bakah Coppa Italia title hi vawi nga zet a chawi bawk.

Chiellini chuan, "Ka theihtawp chu ka chhuah, ka sulhnute kha hriat ve reng a nih tawh ka beisei. May 17, Thawhṭanni zanah Lazio kan mikhual dawn, Juventus Stadium-ah mangṭhana thu ka sawi ang," a ti.

Massimiliano Allegri naute hian Serie A-ah palina chu an hauh phak dawn tih a chiang tawh, nomawi an chawi lo erawh captain ropui thlah nan chuan duhthu a sam lo deuh mai thei, mahse tih theih dang a awm tawh si lo.

Chiellini hian football mangṭha nghal vek erawh a tum lo - Major League Soccer lam pan tura sawi a ni. Amaherawhchu, chhungkua ngaihtuah a ngai tel tawh a, season thara a awm dan tur tak a la sawi chiang thei lo a ni.