Isner tan Nadal a thiam hret

Rafael Nadal leh clay court hi chu an inzawm nghet tlat. Spanih star hian Italian Open khelh laiah John Isner hnehin last 16 an in vaw kai, seeded pathumna a nih phak avangin round hmasa ber a khelh a ngai lo a ni.

Kar hmasa khan Madrid Open-ah Nadal hi Carlos Alcaraz lakah a chak lo. Clay court inelna a hmachhawn zui a, tennis a khelh hun chhungin clay-ah hian a zawna chak loh a nei ngai lo, tun ṭumah hian Isner lakah hian 6-3, 6-1 in hnehna a chang.

Italian Open hi Nadal tan thil thar a ni lo, vawi 10 a champion tawhna hmun a ni. A match lehpekah chuan Denis Shapovalov a hmachhawn dawn, inkhel dangah Shapovalov hian Nikoloz Basilashvili chu 6-4, 7-6 (7-5) in a lo hneh ve bawk.

Tun thla chawhnu lamah French Open khelh a ni dawn, clay court inelna lian hmachhawn turin Nadal tan tun tournament hi inbuatsaihna hun ṭha ber a ni, chuvangin hlawhtlin ngei a tum ang.

Kum 35 mi Nadal chuan, "A bul ka ṭan dan ngaihtuah chuan a hmawr ka bawk dan a ṭha, kar hmasa lama ka match khelh ai chuan hmasawnna hmuh tur pawh a awm," a ti, a khingpui leh tur Shapovalov chu player ṭha a nih thu a sawi bawk.

Inkhel dangah seeded pathumna Stefanos Tsitsipas chuan fiahna a paltlang. Greek tlangval hian match point vawi thum a inchhanhim hnuah, a khingpui khel ṭha tak Grigor Dimitrov chu 6-3, 5-7, 7-6 (7-4) in a hneh hram.

Seeded pahnihna Alexander Zverev pawh a chak. German player hian 7-6 (8-6), 6-3 in Argentine player Sebastian Baez a hneh. Zverev hian French Open-a chet ṭhat a duh chuan tuna khelh ṭhat hi a ngai.