NBA player hlu ber Jokic

Basketball inelna sang ber NBA khel zinga player hlu ber Most Valuable Player atan Denver Nuggets centre Nikola Jokic thlan a ni, season hmasa khan chawimawina sang hi a lo dawng tawh bawk.

Serbian tlangval hian, chawimawina dawng tur hian Philadelphia 76ers player Joel Embiid leh Milwaukee Bucks champion puitu Giannis Antetokounmpo te a khum, a sulhnu chhutin award dawn hi a phu viau.

NBA regular season hman zawh takah khan, chawh rualin match tin 25 points, 13 rebounds leh 6 assists a nei ziah. NBA huangah hian season khat chhunga 2,000 points, 1,000 rebounds leh 500 assists nei tling vek thei awmchhun a ni.

Khawvel huap sports writer leh broadcaster ten vote an thlak a, vote 875 hmuin Jokic hi a chungnung. Embiid (Cameroon) leh Antetokounmpo (Greece) ten an zui a, a vawi khat nan United States player lo hlirin a sang pathum an luah.

Nuggets head coach Michael Malone chuan, "Nikola chungchangah hian eng nge ka sawi leh chuan ang, season tluanin ṭha takin a khel a, team innghahna leh thlamuanpui a ni bawk, ani fakna turin ṭawngkam ka thiam tawk lo.

"A ṭhatzia hi ka sawi fo tawh a, min ṭawmpuitu an tam avangin vote pawh a hmu hnem. Hmabak erawh a la nei, tun aia ṭha lehzual hian a la khel thei, a taksa hi basketball khel tura duan a ni," tiin a sawi.

Jokic hi mimalin ṭha viau mah se, a team Nuggets hi Western Conference-ah parukna an ni. Conference playoff round hmasa berah Golden State Warriors chu 4-1 a hneh loin an season zinkawng chu a lo tawp fel tawh.