Chelsea-in Leeds an hneh - thawnthu inang lo chu!
Nilaini zan Premier League inkhelah Chelsea chuan 3-0 in Leeds United an hneh a, Mason Mount, Christian Pulisic leh Romelu Lukaku ten goal khat ṭheuh an khung.
Chelsea-in hnehna an chan avangin season thara Champions League khel turin an dinhmun a ṭha ta sawt a, hetihlai hian Leeds United erawh tla thei dinhmunah an din chhunzawm.
Blues hian an chak avangin point 70 an nei a, match hnih chiah khelh tur an nei tawh - he thu buatsaih laia pangana Tottenham Hotspur aia an sanna chu point riat a ni.
Leeds erawh an tlawm avangin relegation zone-ah an tla a, match hnih khelh tur la nei chungin 17-na Burnley nen an point hmuh zat a inang - Burnley hian league match thum khelh tur an la nei thung.
Chelsea an vul
Roman Abramovich hrek boruak leh club hralh inkarah Chelsea an talbuai a, season ṭantira champion thei tura beisei team khan Leeds an hmachhawn hmaa an league match hnuhnung pathumah chak an nei miah lo.
London club hi season thara Champions League khel turin an dinhmun a derthawng hman hial. Mahse, Leeds khelmualah erawh Thomas Tuchel-a nauten thawnthu dang an ziak ta a, goal pawh an khung hma.
Minute lina lekah midfielder ṭhangduang Mason Mount chuan mawi taka ball an inpek hnuah goal hmahruai a khung a, minute 24-naah Daniel James chu red card pek zui a nih avangin Leeds tan thawh ngaihna a awm tawh lo.
Manchester United winger hlui hi Mateo Kovacic laka a chet dan hlauhawm tak avangin hnawhchhuah a ni a, Kovacic hi lakchhuah a ngai. Blues boss Tuchel chuan, "A inhliam tawhna kerekah tho a ni a, a dinhmun a ṭha lo," a ti - Inrinni zanah Liverpool nen FA Cup final an khel dawn a, Croatian midfielder inhliam hi a pawi thui thei.
A tawk lo
Chak mamawh Leeds-in kim loin an khelh a ngai a, team ṭha zawk Chelsea-in an mikhualna ramah mikhual tlangnel zia an chhuah zui - goal dang lut lawk lo mah se chak tur a chiang tiin a sawi ngam.
Chelsea hian 68% zet ball an chang a, vawi 17 shot an nei a, hemi zinga pali chu target-ah a kal. Minute 55-naah Pulisic chuan goal hnihna a khung zui a, goal hmahruai khungtu Mount-a siamsak a ni.
Minute 83-na a ni a, Lukaku inlar hun a ni. Belgian striker hian Leeds defender rual pal darhin a theihna a pholang a, an goal thumna a khung - Chelsea an chak chiang.
Chelsea a pan hnua beisei phak lo Lukaku-a'n a theihna a pholang leh ṭan a, tun season-a match 45 a khelh aṭangin goal 15 a khung tling ta - Blues player zingah tun season-a ani aia goal khung hnem an awm lo.
Tihpalh Gandhi!
Leeds United coach Jesse Marsch hi India hnampa Mahatma Gandhi ngaisangtu a ni a, a player-te chu mi ropui leh langsar te ṭawngkam hmanga a fuih phur fo ṭhin thu a sawi.
Marsch hian a team te chu Gandhi anga beiseina nei tlat a, boxer ropui Muhammad Ali anga an hmaa inchhawpte huaisen taka bei turin a duh - mahse, Chelsea lakah an zawr.
Leeds hian Premier League khelh chhunzawm loh an hlauh avangin February thla tawp lam khan coach Marcelo Bielsa an ban a, a thlak turin Jesse Marsch hi an lalut zui.
Mahse, American coach hnuaia league match sawm an khelhah vawi thum chiah an chak a, vawi hnih draw result neiin vawi nga an tlawm - season thara Premier League khel chhunzawm turin an hmabak match hnihah an chak ve ve a ngai a, team dang chetsual an chân tel a ngai bawk.
Hmabak
Leeds United
May 15 Brighton & Hove Albion (H)
May 22 Brentford FC (A)
Chelsea
May 14 Liverpool (FA Cup Final)
May 19 Leicester City (H)
May 22 Watford (H)