Chak zo lo Everton an him?

Everton-in Premier League aṭanga tla chiang tawh Watford lakah goal an khung thei lo a, khualmualah 0-0 in an inhnehtawk - Watford tan mahni muala match 11 zet a zawna an tlawm record chu tihtawpin a awm ta bawk.

Frank Lampard-a enkawl Everton-in goal khung thei lo mah se Chelsea laka Leeds United an tlawm avangin an dinhmun erawh a him ṭanah a ngaih theih a, table-ah 16-na an ni.

Everton hian match thum khelh tur an la nei a, 18-na Leeds aiin point hnihin an sang - match khatin an khel tlem bawk a, an kutah engkim a innghat tawh.

Lampard-a'n Merseyside club hi an inhamtan pui thei lo a nih chuan mualphona tawpkhawk a ni ang - hna thar hmuh a harsa tawh mai thei!

Everton an vanduai
Lampard-a'n midang kuta innghah ai chuan mahnia chinfel mai a duh a, Everton-in chak tumin Watford an nawr - mahse, Premier League-a khelh chhan nei tawh lo team hian tlawm an duh bik lo.

Everton chance ṭha bera chhal ngam chu Demarai Gray-a'n a nei a, mahse, Rafael Benitez hnuaia hming chher hman English winger hian hun duhawm tak hi engmah lo maiah a chantir.

Brazil international Richarlison pawhin a club hlui lakah chance a nei a, mahse, a shot kal per chu Watford keeper Ben Foster chuan ṭha zetin a dansak.

Everton hian 52% ball changa vawi 16 shot neiin, vawi nga chu goal zawnah a kal a, tla chiang tawh Watford erawhin chhanletna mumal an nei lo.

Watford coach thar
Football khawvela tawnhriat nei ṭha Roy Hodgson-a'n season tharah Premier League club enkawl a tum tawh loh thu a sawi a, Watford pawhin Everton nen an inkhelh hmain coach thar an nei.

Watford hian League Two-a Forest Green Rovers champion puitu Rob Edwards chu an coach thar turin an lalut a, Forest Green hian Watford chet dana an lawm loh thu an sawi zui.

League Two champion lamin an tarlan danin Watford leh Edwards hi a rukin an indawr. Forest Green neitu Dale Vince chuan, "Edwards hian Watford leh a agent ten an indawr thu kan laka zep turin an hrilh, niin a sawi," a ti a, a lawm lo hle.

Hetihlai hian Watford chuan Edwards hian a contract-ah a duh huna club dang be tura zalenna a neih thu a inziah tel thu an sawi - kum 39 mi coach hi kum 2018 hnua Watford-in coach nghet (lailawk tel loin) an neih pariatna tur a ni.