Scottish Premiership champion Celtic

Season hmasa khan Steven Gerrard enkawl Rangers-in season 10 chhung a zawna Scottish Premiership champion ni tur Celtic kalkawng dalin nomawi an chawi a, Gerrard a chhuah hnuah Rangers-in an pu hlui hoa an hna thawh an chhunzawm thei lo.

Celtic chuan Nilaini zan khan khual-mualah Dundee United chu 1-1 in an inhnehtawkpui a, match khat khelh tur la awm mah se pahnihna Rangers-in an um phak thei tawh lo a, an champion.

Khualmualah Celtic tan Giorgos Giakoumakis chuan minute 53-naah goal hmahruai a khung a, Dundee-in Dylan Levitt hmangin chhanglet mah se, hun tawp thleng goal dang a lut lo a, Celtic an champion zui ta a ni.

Australia coach hlui Ange Postecoglou-a'n Celtic-a a season hmasa berah league nomawi a chawi nghal a, Scottish football-a a hun tawn ropui hi a hre reng tawh ang.

Celtic tan Japan
Asian football-in nasa takin hma a sawn zel a, tun season-a Celtic-in Scottish Premiership nomawi an chawi nan pawh hian Japanese player thawhhlawk tak tak an awm nual.

Celtic boss Postecoglou hian January, 2018 - June, 2021 inkar khan J League club Yokohama F. Marinos a enkawl a, Japanese player zunah a uai - Japanese striker Kyogo Furuhashi, forward Daizen Maeda, midfielder Yosuke Ideguchi leh midfielder Reo Hatate te a lalut.

Scottish club tan inelna hrang hranga match 32 a khelh aṭanga goal 18 leh assist vawi nga neitu Furuhashi hian July khan Celtic hi a zawm a, player dang pathum erawh December, 2021-a a lakluh vek an ni.

Winger Maeda hian match 21-ah goal riat leh assist vawi hnih a nei a, midfielder Hatate-a'n match 21-ah goal li leh assist vawi thum a nei a, midfielder Ideguchi-a'n match nga bak a khel lo thung.