Dream Final Rafael vs Roger
Rafael Nadal leh Roger Federer ten 2017 Australian Open nomawi an inchuh dawn. Pathianni tlai dar 2:00-ah tennis player ropui ber pahnihte hi an intawng dawn a, khawvelin Melbourne Park lam a hawi ang.
Federer leh Nadal te hi vawi 34 an inhmachhawn tawh a, kum naupang zawk Nadal hian vawi 23 hnehna a chang tawh. Grand Slam final bika an intawn hnuhnung ber chu 2011 French Open final kha niin Nadal-a'n hnehna a chang.
Nimin tlai khan Rod Laver Arena-ah mipa singles semifinal hnuhnung zawk khelh a ni a, Grand Slam vawi 14 champion tawh Nadal-a'n 6-3, 5-7, 7-6 (7-5), 6-7 (4-7), 6-4 in hnehna a chang - an inkhelh hun chhung hi darkar li leh minute 56 zeta rei a ni!
Kum 30-a upa Nadal-a'n inkhel bul a ṭan ṭha zawk a, harsa lo takin set khatna a la. A zawna match 10 chhung hnehna chang zawn thawh Dimitrov a zam bik lo a, harsa takin set hnihna a la ve thei tho. Set hnuhnung berah Nadal-a'n a tawnhriat neih a chhawr ṭangkai. Game li ve ve an lak hnuah Spain tlangval hian Dimitrov service a chhuhsak a, Bulgarian tlangval hian match point vawi hnih chu pawt khawtlai thei mah se Nadal a dal zo lo.
Player pahnih an thawkrim a, an huaisen bawk. Nadal-a'n a service vawi li a hloh a, a khingpui service chhuhsak theihna hun vawi 13 a neih zinga ṭum nga a chhawr ṭangkai thei bawk. A vawi khat nana Grand Slam final khelh tum Dimitrov khel ṭha viau mah se unforced errors vawi 69 zet a nei a, Nadal-a'n vawi 45 a nei thung - hei hi inkhel result siam danglamtu lian ber pakhat a ni.
Nadal hian kum 2014 French Open-ah khan a Grand Slam nomawi 14-na a chawi a, hemi hnuah tun ṭum hi final a luh lehna hmasa ber a ni.
Nadal chuan, "Grigor khan a khelṭha takzet a, inkhel hautak tak a ni. Hliam leh harsatna tam tak ka paltlang hnua final ka lut leh thei hi ka lawm a, tunah chuan ka chau takzet. Final-a ka khingpui tur Federer pawh a chau hle ang tih ka ring ve tho a, keini pahnih hi major tournament final-ah kan intawn leh hi ka ring phak lo zawk tawh hial a, tunah chuan duhthusam kha a thleng leh ta," a ti.
Kumin Australian Open final-ah hian kum danga thil thleng ngai zen zen lo kan hmu dawn. Mipa leh hmeichhe final khel tur pali - Nadal (30), Federer (35), Serena Williams (35) leh Venus Williams (36) te hi kum 30 chuang vek an ni. Heng player ropui pali te hi 2008 Wimbledon final-ah khan an lo inlan rual vek tawh bawk.
Federer a phur
Grand Slam vawi 17 champion tawh Federer chuan final-a a khingpui tur Nadal chu a nuna chona hautak leh khirhkhan ber siamsak ṭhintu a nih thu a sawi chhuak.
Final thlirlawkin kum 35-a upa Federer chuan, "Rafa hian inkhel bikah chuan chona hautak ber min siamsak ṭhin. A inkhel hi a hmuhnawmin a theihna hi a sang em em a, inrintawkna a neih ṭhat ṭhin em avangin hmachhawn harsa ber a ni hial ang," tiin a khingpui tur chungchang a sawi.
Season hmasa khan Federer hi Wimbledon semifinal-a a chak loh ṭumin a khup vei lam a hliam a, zai a nih avangin season chawhnu lam zawng a inkhel thei lo. Kuminah a hliam dam tawhin inelna a hmachhawn hmasa berah seeded 17-na daih ni mah se final a luhna tur kawngah dal zotu a tawng lo.
Open Era china mipa singles major title la hnem ber Federer hi a champion leh a nih chuan ama record awm sa (17 titles) a siam belh dawn tihna a ni a, kum 2012 Wimbledon hnua a a title hmasa ber a ni ang.