FA Cup: Southampton mikhual tur Arsenal
Zanin dar 11:00-ah Southampton chuan FA Cup fourth round khel turin Arsenal an mikhual dawn. Saints hi Liverpool hneha League Cup final lut hlim an nih avangin Gunners hna hi a awlsam dawn lo.
Claude Puel kaihhruai Southampton hian League Cup-ah goal chhuah loin final an lut thei a, an kalkawngah Arsenal chu Emirates Stadium-ah 2-0 in an hneh. Tun ṭuma an intawnna tur erawh FA Cup a ni thung.
Knock out inelna upa ber FA Cup-ah Arsenal leh Manchester United te hi vawi 12 champion tawhin record nei ṭha ber an ni a, tun hnai season thum chungin Gunners hian nomawi vawi hnih an chawi.
Arsenal tan Theo Walcott chu squad-ah a lo kir leh tawh a, Per Mertesacker leh Mathieu Debuchy te pawhin Zirtawpni khan full trainig an nei thei tawh. Burnley laka hnawhchhuah Granit Xhaka chu hrem a ni dawn a, Swiss midfielder bakah hian Mohamed Elneny chu Africa Cup of Nations khelh vangin a la inlan thei lo bawk ang.
Eng inelnaah pawh nomawi chawi a har tawh, a hrechiangtu pakhat chu Arsene Wenger hi a ni. Gunners manager hian third round-a Preston North End an hneh ṭum pawhin a player ṭha ṭhenkhat a khelhtir tawh. Champions League leh league lama a chhawr rim Mesut Ozil, Alexis Sanchez leh Laurent Koscielny te a chawlhtir a nih pawhin Saints hneh tur chuan tawnhriat ngah midang a dah luh a ngai dawn.
Tun dinhmunah Saints hi hliam vangin an buai ru hle. Defender pawimawh Virgil van Dijk chu hliam vangin a la inlan thei dawn lo a, Liverpool an hmachhawn ṭuma hliam tenau tuar James Ward-Prowse leh Jay Rodriguez te dinhmun a la chiang lo bawk.
Premier League club lian dang zingah Manchester City chuan Crystal Palace an lenchilh bawk ang.
FA Cup - Fixtures
January 28, Inrinni
Derby County 1:25 AM Leicester City
Liverpool 6:00 PM Wolverhampton
Tottenham Hotspur 8:30 PM Wycombe Wanderers
Oxford United 8:30 PM Newcastle United
Lincoln City 8:30 PM Brighton & Hove
Chelsea 8:30 PM Brentford
Rochdale 8:30 PM Huddersfield Town
Burnley 8:30 PM Bristol City
Blackburn Rovers 8:30 PM Blackpool
Middlesbrough 8:30 PM Accrington Stanley
Crystal Palace 8:30 PM Manchester City
Southampton 11:00 PM Arsenal
January 29, Pathianni
Millwall 5:30 PM Watford
Fulham 6:00 PM Hull City
Sutton United 7:30 PM Leeds United
Manchester United 9:30 PM Wigan Athletic