NM Gupta Trophy Football Tournament Semi final-ah Mizoram

Player 10-a khel chunga Assam Rifles, Shillong hnehtu, Mizo­ram football team chuan 31st Captain NM Gupta Trophy Football Tourna­ment semi final an lut ta.

Nimin tlaia Silchar-a SM Dev Stadium-a inkhelah Mizoram hian Assam Rifles hi 2-1 in an hneh a, second half hun tam zawk chu player 10-in an khel. Mizoram tana Lal­chhuanawma goal thun chu Assam Rifles lamin penalty aṭang-

in an sût a, Bethlehem Veng­thlang FC forward Lal­rammuanpuia (Apuia) chuan minute 74-naah chakna goal a thun ta a ni.

Mizoram hi khelh thum­ah an la chak fai vek avangin point kua hmuin semi final an lut tawh a, goal sarih khungin goal khat an chhuah. January 30, Thawhṭanni hian Mizo­ram hian an group match hnuhnung berah Aruna­chal SS an tum leh ang.

Champion-in Rs 5,00,000 an dawnna tur tour­nament-ah hian Mi­zo­­ram aiawhin San­tosh Trophy khel tur team an tel a, AR lakah hian Mizo­ram hian inkhel thu­nun­in minute 21-naah ONGC, Mumbai lama khel mek Chhuantea chuan goal hmahruai ni turin Ramfangzauva freekick pet chu a tauh lut. Mizoram hian penalty an chawi zui a, Assam Rifles-in an sut a, half time-ah 1-1 a ni.

Second half a ni a, Mizoram player Jesse chuan a yellow card vawi hnihna a hmu a, minute 55-naah hnawhchhuah a ni. Player 10-a khel Mizoram hian minute 74-naah chakna goal an thun a, corner aṭanga ball lo phei chu Apuia'n a khung a ni.

Mizoram team mana­ger Peter Lalzawmliana chuan, "Pathianin min pui a, kan vannei a ni e. Silchar Mizo mipui ṭhahnem takin min ṭawiawm a, an chungah kan lawm takzet bawk a ni," a ti.

Inelna Thlirna Tawi
Group B
Results
ARC, Shillong 0 - 0 Assam Rifles Shillong

Mizoram 4 - 0 ASC, Bangalore
MIZ : Lalbiakhlua 33', 85'; Lalrammuanpuia 58'; Lalfakzuala 68'

Arunachal SS 1-0 Assam Rifles, Shillong
Mizoram 1 - 0 ARC, Shillong
MIZ : Lalbiakhlua 85'

Arunachal SS 2 - 1 ASC, Bangalore

Nimin Inkhel Result
Mizoram 2 - 1 Assam Rifles, Shillong
MIZ: Lalchhuanawma 21'; Lalrammuanpuia 75'
Red Card: Jesse 55'