Chennai khawpuiah AFC fiahna

Aizawl FC-in tun sea­son I League-ah hneh loh an la tawng lo a, match thum chhung an chak zawn tawh bawk. Zanin dar 7:05 hian Mizo club-in Jawaharlal Nehru Stadium-ah Chennai City an lenchilh dawn a, Ten 2-ah a en theih ang.

Chennai City hian an match hmasa berah anmahni ang bawka kai thar Minerva Punjab an mikhual a, an inhnehtawk. I League club thar pahnih hian hemi hnu hian point an hmuh belh tawh lo. RG Stadium-a Mizo club hneh lotu Minerva hian Pathianni tlai dar 4:35-ah East Bengal an hmachhawn ang.

Vawiin tlai hian Shillong Lajong leh Mumbai FC te an inkhel dawn bawk a, Shillong-a inkhel tur club pahnih hi tun season-ah Aizawl FC-in an hneh ve ve tawh. Lajong hian khualmuala match thum a zawna an chak loh hnuah an mualah Minerva Punjab an hneh a, chak nawn an tum ngei ang.

Aizawl FC khingpui tur Chennai City tan hian Malsawmfela leh a nau Lalnunmawia te an inlan tawh a, amaherawhchu an match hnuhnung bera Mohun Bagan an hneh loh ṭumin Mizo tlangval zingah squad-a awm an awm lo. Chennai City coach Robin Charles Raja hote hian point khat chauh la hmu mah se Mohun Bagan lakah goal an khung hmasa thei a, Mizo club tan a awlsam lo ang.

MPL club tana thu lawmawm chu coach Kha­lid Jamil-a chhawr theih turin player-te an dam ṭha vek. MPL3 best player Lalramchullova a dam ṭha tawh a, inhliam vanga Mumbai FC hmachhawn thei lo H. Lalmuankima'n trai­ning a zawm leh tawh bawk.

Chennai Mizote pawh Mizo club ṭawiawm turin an inbuatsaih ṭha a, Aizawl FC-in khualmualah anmahni mual ang maia an tlangnel theih nan boruak siam an tum tih Chennai Mizo Welfare Association general secretary Lalchawi­mawia chuan Vanglaini palai a hrilh.