Williams unau indona Serena vs Venus

Kumina Grand Slam hmasa ber Australian Open hmeichhe singles nomawi inchuh turin Venus leh Serena Williams te Inrinni chawhnu dar 2:00-ah an inhmachhawn dawn. Williams unau an intawn hmasa ber aṭanga kum 19 hnuah a vawi 28 nan an intawng leh dawn a ni, inkhel hi Sony Six-ah en theih a ni ang

Tournament khelh ṭan a nih hma khan Williams unauin nomawi an inchuh ang tia ringtu an awm kher lo ang. American unau hi an kum tam deuh tawh mah se beisei phak bakin an khel ṭha tluang a; Serena hian final lut turin match ruk a khelhah set a hloh miah lo - Venus pawh hian set khat chiah a hloh.

Old is Gold

Kum 36-a upa Venus hi Open Era bikah chuan Australian Open final khel thei tur upa ber a ni a, semifinal-ah Coco Vandeweghe chu 6-7 (3-7), 6-2, 6-3 in a hneh. Major tournament bikah chuan kum 2009 hnua final a luh lehna hmasa ber a ni.

Grand Slam vawi sarih cham­pion tawh Venus hian semifinal-a hnehna a chan hnuah, "Mitin hian vullai leh ṭhat lai kan nei ṭheuh a, kei chu midang aiin ka vanglai a rei bik," tiin a lo sawi tawh.

Venus hian October 1994 aṭangin professional tennis a luhchilh a, hetih hunlai hian kum 14-a upa chauh a la ni. Kum 22 zet a liam hnuah pawh Venus hi player ṭha leh hlauhawm berte zinga mi a la ni reng. Grand Slam final a khelh hmasak ber pawh kum 1977 US Open daih tawh kha a nih avangin 'Ka ṭhatlai a rei bik' tia a sawi hi a mak lo.

Serena hlau ru!

Steffi Graf-i'n Grand Slam nomawi 22 a chawi kha khawvelin ropui a ti a, tluk leh theih loh tur hial a ngaih a ni. German nula in kum 1999-a French Open nomawi chawi chunga Open Era record a siam hi nikum khan Serena chuan Wimbledon champion niin a rawn nih rual! Serena hi a champion leh a nih chuan tuma thik phak loh a ropui a ni dawn.

Kum 35-a upa Serena chuan, "Record hi ka ngaihtuah ber a ni lo, chutih rualin ka inkhel a nih chuan hnehna chan ngei ka tum ṭhin," tiin unau inkhel tur mah nise inel an nih avangin inhlahthlemna rilru an neih loh thu a sawi.

Australian Open champion vawi ruk ni tawh Serena hian nikum final khan Angelique Kerber a hneh lo a, beisei anga season a hman ṭhat loh avangin world number 1 nihna pawh German nula Kerber lakah hian a chan zui bawk - tun ṭum­ah hian hnehna a chang a nih chuan ranking chhuak tharah pakhatna a ni leh ang.

Sulhnu chu...

Final khelhna tur Rod Laver Arena hi Williams unau lung tilengtu a ni. Kum 1998 khan second round-ah an intum a, professional match-a Wiliams unau intawn hmasa ber ṭum hian Venus-i'n hnehna a chang. Melbourne-ah hian kum 2003 final khan intawng lehin Serena a chak ve thung.

Williams unau hi vawi 27 an inhmachhawn tawh a, a naupang zawk Serena hian vawi 16 hnehna changin record a nei ṭha zawk. An intawn hnu­hnung ber chu 2015 US Open quarterfinal kha niin Serena-i'n hnehna a chang.

Final thlirin Serena chuan, "Venus hi ka khingpui tawh ho zingah chuan khelh a harsa ber! Player dang zingah ani aia ka laka hnehna chang tam an awm lo," tiin a sawi.

An record en chuan Serena hi chak zawk tura ngaih a ni a, chutih rualin tennis a khelh hun chhunga a huphurh leh hneh loh ngun ber hmachhawn tur a nih avangin awlsam takin hnehna a chang lo ang. Unau an ni a, hmun dangah chuan inngeih leh lungrual takin an awm pawh a ni thei - Court chhungah erawh chuan inel an nih avangin nomawi chu awlsam takin an inkian mai lo ang tih a chiang.