Team talbuai Real inlan dawn

Sevilla-in match 40 chhung chak lo hmel hmu loa an kaltluan an tihtawp sak hnuah Real Madrid an tho leh tawh lo - an match hnuhnung pangaah vawi khat chiah hnehna an la chang a, Copa del Rey quarterfinal aṭangin Celta Vigo-in an pet chhuak bawk.

Real hian Pathianni zan dar 1:15-ah league match khel turin Real Sociedad an mikhual dawn. Zawhna awm chu Zinedine Zidane-a naute an insiamṭha thei dawn em? tih hi a ni.

Madrid khaw club hian Gareth Bale, Luka Modric, James Rodriguez, Pepe, Dani Carvajal leh Marcelo te hliam vangin an chhawr thei lo mek a, coach Zidane chuan first team zingah youth team aṭangin Achraf Hakimi, Alvaro Tejero leh Enzo Zidane te training a neih tir - Real an buai tih hai rual a ni lo.

Players hliam tam vang­lai taka Real buaina chu an tlarhma ten beisei an phak lo hi a ni. Cristiano Ronaldo thiam zia inhrilh nawn a ngai lo a, hetihrual hian Portuguese striker hi tun hnaiah a che ṭha hle - Karim Benzema leh Alvaro Morata te an bang chuang lo. French striker Benzema-a'n 1,690 minutes khel chungin tun season-ah goal 12 bak a la khung thei lo a, minutes 1,150-a goal kua khungtu Morata a bang bik lo. Zidane-a'n an mangchhia aṭanga harh a duh chuan tlarhma lamin an hna an thawh a ṭul ang.

Spanish Cup aṭanga petchhuah an nih hnu lawkah Zidane hian, "Tun kan tih tur chu hahdam taka awm a, kan hmabaka chona inchhawpte thlirlawk a ni. Theihtawp chhuahin kan khel chhunzawm zel ang a, La Liga leh Champions League-ah kan beiseina chhi nung turin kan beih chhunzawm zel ang," tiin a sawi a, zaninah French manager hian chak loh a duh dawn lo.

Fixtures
Zanin Inkhel Tur
Villarreal 5:30 PM Granada
Deportivo Alavés 8:45 PM Atlético Madrid
Eibar 11:00 PM Deportivo
Leganés 1:15 AM Celta de Vigo
January 29, Pathianni
Real Betis 4:30 PM Barcelona
Espanyol 8:45 PM Sevilla
Athletic Bilbao 11:00 PM Sporting Gijón
Real Madrid 1:15 AM Real Sociedad
January 30, Thawhtanni
Las Palmas 1:15 AM Valencia