Republic Day-ah India an tlawm

India chuan Republic Day lawm nan Ningani khan England chu Twenty20-ah hneh tum viau mah se an ngam lo a, wicket sarih zetin an tlawm. India leh England hian T20 series match thum khelh tur ruahmana match hmasa ber chu Republic Day-ah an khel a, India fan-te beisei ang erawh an pe thei lo.

Kanpur khawpuia team pahnih inkhelah India an bat hmasa zawk a, an innghahna Virat Kohli (29 runs), Suresh Raina (34 runs), Yuvraj Singh (12 runs) leh MS Dhoni (36 runs) ten beisei an phak loh vek avangin over 20-ah run 147 siamin wicket sarih an hloh.

England bat hun a thleng a, Jason Roy (19 runs) leh Sam Billings (22 runs) te an chet ṭhat loh avangin India tan beiseina chhit tharin awm mah se run 46 siama a tawp thleng dam Joe Root leh run 51 siamtu captain Eoin Morgan te an chet ṭhat avangin England-in over 18.1-ah wicket thum chauh hloh chungin target an umpha a, ODI series-a an ngam loh India an hneh.

India leh England hian T20 series match hnihna chu Pathianni zan dar 7:00-ah an khel lehnghal dawn a, Nagpur khawpuia inkhel turah hian India tan chak loh a thiang tawh lo - an tlawm nawn a nih chuan match khat chiah an hmabak tawh dawn avangin England-in series an la ang.