United-in Wembley an thleng ta

"Club hmingthang Man United kan ni a, Wembley kan pan dawn," tiin Manchester United ṭantute KCOM Stadium-ah an zai rual a, Jose Mourinho hote hian February 22 khian Wembley Stadium-ah Liverpool hnehtu Southampton an hmachhawn ang.

Manchester United hian English Football League Cup final thleng mah se an beisei angin Wembley Stadium kawng erawh a nuam lo. Ningani zanah Hull City-in minute 35-naa Tom Huddlestone penalty hmangin hma an hruai a, khawvel player manto ber Paul Pogba goal hmangin United-in minute 66-naah an siphurh an sut. Amaherawhchu Tigers forward Oumar Niasse-a'n minute nga a la awm tihin goal a khung a, Old Trafford-a 2-0 a chak United hi hun tawp thlengin an talbuai a, Wembley Stadium khelh theihna ticket erawh an nei hram.

17-ah a tawp!

Jose Mourinho hoten inelna hrang hrang match 17 chhung hneh loh an tawn loh hnuah Hull City lakah 2-1 in an chak lo a, EFL Cup final thleng mah se November thla tira Fenerbahce (Europa League) lakah an tlawm hnuah hneh loh an tawng a, Portuguese manager Mourinho erawhin a pawm duh lo.

Kum 54-a upa Jose Mourinho chuan, "Match 18 chhung hneh loh kan tawng lo hi a ropui ka ti. Kan chak lohna ka hre lo a, kei chuan goal hnih chauh ka hmuh avangin 1-1 in inkhel a tawp. Paul Pogba leh hun tawp dawna goal mawi tak an khung bak kha ka hmu lo," tiin penalty an chawi danah a lungawi lo a, replay enin Portuguese manager thusawi hi dik mah se referee hi thuneitu a ni.

Penalty chungchang an zawt zuina chu Mourino chuan, "Ka hmu lo. Team hmasawn tak kan hmu a, Hull manager hi ka sawi lawk ang khan a ṭha a ni. Final kan thlen avangin kan lawm a, penalty leh kan khelh dan chungchang erawh ka sawi duh lo," tiin referee Jonathan Moss chungah a lawm lo tih a lang tel bawk.

Mourinho leh referee Moss te inkar hi a ṭha hran lo. Portuguese manager-in nikum November thlaa tui um a pet ṭuma mipui ṭhutna lama thawhchhotu kha Moss hi a ni a, he referee vang bawk hian Mou­rinho-a'n Chelsea a enkawl laiin match khat stadium a tlawh thei lo a, £40,000 a chawi phah bawk.

Derby hun sawn

Tun season-a Manchester Derby vawi thumna chu Feb­ruary 26-a khelh tur a ni a, amaherawhchu United-in EFL Cup final an khelh dawn avangin a hun sawn ni ang.

United hian final-ah jersey sen an ha dawn tih a chiang tawh a, final khelh hun leh derby khelh hun tur erawh tihchian a la ni lo.

EFL Cup a pawimawh

Manchester United manager Jose Mourinho chuan, "Ka tan chuan inelna zawng zawng a pawimawh a, kan match hmabak apiang hi a pawimawh bawk. Wembley hi chu Wembley a ni miau a, he stadium hi chuan hlut bikna riau a ni a, United ṭantute nena he stadium kan pan thei tur hi ka lawm a ni. Keimah ang bawkin player-te pawhin an ngai hlu ngei ang," tiin EFL Cup chu inelna dang ang thoa a hlut thu a sawi.

Portuguese manager hian a thusawi a takin a lantir bawk a, Hull City an hneh ṭum pawh hian player pawimawh Zlatan Ibrahimovic leh Paul Pogba a awltir chuang lo.

FA Cup-ah Wigan

Manchester United-in Pa­thian­ni zan dar 9:30 hian Old Traf­ford-ah Wigan Athletic an mikhual dawn a, Latics boss Warren Joyce hi United reserves manager hlui a ni.

Portuguese manager Mou­rinho chuan, "Wigan-in match an nei ve lo a, kan inkhel tur atan tawp an inpuahchah thei ang. Chuvangin a awlsam dawn lo a, amaherawhchu kan mualah kan khelh dawn avangin kan chak theih ngei ka ring a, player pawh siksawi deuh a ṭul ang," tiin Latics chu Championship-ah table hnuai lamah awm mah se chetsual theihna a nih thu a sawi.