Chapecoense tan sum hmu hnem

Brazil chuan Colombia chu friendly match-ah striker Dudu goal hmangin 1-0 in an hneh a, thlawh­theihna chesual avanga Cha­pecoense players leh staff thi ta te puala inkhelah hian £300,000 aia tam sum hmuh chhuah a ni.

Rio Olympic Stadium a inkhel ṭan a nih hmain Chape chhiatna aṭanga dam chhuak players pathum central defender Neto, left back Alan Ruschel, goalkeeper Jackson Foll­mann leh journalist Ra­fael Henzel te chu mipui hmaah phochhuah an ni a, lawm an hlawh hle.

Copa Sudamericana final khel tura zin chhuak Chapecoense team chuanna LaMia thlawhtheihna November 28-a chesualah khan mi 77 chuangin an zinga mi paruk chiah an dam chhuak a, an zinga mi 43 chu Chape players leh staff an ni.