Copa del Rey Semifinal-ah Barcelona an lut
Spanish Cup semifinal-a Real Madrid an luh zawh loh laiin Barcelona tan erawh Copa del Rey-a a thiam pali zinga tel turin harsatna a awm lo - Catalan club hian Ningani zan khan Real Sociedad chu 5-2 in an sawp a, inkhel pahnih belhkhawmah 6-2 a hnehna changin semifinal an lut.
Barcelona tana player langsar ber chu Suarez a ni a, tun ṭuma langsar Suarez erawh Luis Suarez niloin Denis Suarez a ni. Kum 23-a upa midfielder hian goal hnih a khung a, Barcelona-in season sarih chhung a zawna Copa del Rey semifinal an luh theih nan a thawh hlawk hle.
Inkhel chu
Nou Camp-a inkhelah inkhel ṭantir aṭangin Barcelona an chungnung nghal a, Denis Suarez chuan minute 17-na lekah a finishing tawih hmangin goal hmahruai a khung - he goal luh theihna tur hian Samuel Umtiti, Neymar, Lionel Messi leh Luis Suarez ten ṭha takin ball an inpe kual a, a hmawr bawkna pawh a 'class' hle.
First half-a goal dang a luh loh hnuah Lionel Messi chuan chawlhlawk hman a nih aṭanga minute 10-na lekah penalty
aṭangin an goal hnihna a khung a, mikhual team tan Juanmi chuan goal khat rawn khung ve zeuh mah se minute khat pawh a liam hmain Luis Suarez chuan Barca goal thumna a khung.
Nou Camp-ah Real Sociedad-in awlsam taka tlawm an duh bik lo a, Willian Jose hmangin minute 73-naah an si phurh an sut ṭhen ve leh - he goal hi mikhual team beiseina thar siamsaktu ni loin Barca chhaih kawlhna mai a ni.
Barca tan Arda Turan chuan minute 80-naah an goal lina a khung a, a hnu khartu chu Denis Suarez bawk a ni. Manchester City midfielder hlui hian mawi taka Sociedad player vawi hnih lai a bum hnuah goalkeeper a tlan hel a, an goal ngana a khung chiang hle.
Hmasawn inti Suarez
Barcelona midfielder hmabak nei êng tak Denis Suarez chuan, "He hmunah hian he team member zinga tel ve duhin ka lo kal a, nitin hian hma ka sawn zel niin ka inhria," tiin Nou Camp chu pan fuh a inti hle.
Substitute bench aṭanga a match tam zawk kheltu midfielder chuan MSN fak nghalin, "Kan tlarhma player pathum hi en ula, kan tan chuan hna hi a awlsam em em a ni. Kan rilruah hlauhthawnna engmah a awm lo a, kan game thununa kan khelh
ṭhat chhawm nun zel hi kan duh ber chu a ni mai," a ti.
Enrique thukhawchang
Barcelona coach Luis Enrique chuan Messi fakin, "Leo hi chu a duhna hmun apiangah a khel thei a ni. A keah ball a awm tawh a nih chuan lo insiamrem vat hi player dang chan chu a ni tawh a, a chhan chu ball ṭha tak an hmu dawn tih a chian sa vang a ni," a ti.
Spanish manager chuan Denis Suarez fak nghalin, "Denis khan a khel ṭha takzet a, field lai aṭanga khelmual lehlam a thleng vat thei hi a chakna lai chu a ni a, penalty area-a a awm tawh chuan a hlauhawm em em zel bawk a ni," tiin City aṭanga Barcelona B team zawmtu chungchang a sawi.
Enrique chuan sawi chhunzawmin, "A tirte aṭangin ṭang ata khelh a ngai a, an player neih dan leh theihna enin a harsa dawn tih kan hre sa a, mah se harsatna an siam tur kha ṭha takin kan dang chat thei a ni," a ti.
Hmabak
Inelna hrang hranga an match hnuhnung pangaa hnehna la chang vek Barcelona hian Pathianni tlai dar 4:30-ah league match an khel lehnghal dawn a, Real Betis khelmualah an lenglut ang - league hmahruaitu Real Madrid chu vawi khata khel tam zawk chungin point hnihin an phak lo mek.
Spanish Cup champion ngun ber nichunga vawi 28 nomawi chawi tawh Barca-in Copa del Rey semifinal an luh hma hian Atletico Madrid, Celta Vigo leh Alaves te chu a thiam pali zingah an tel chiang tawh a, semifinal-a inhmachhawn tur erawh a la chiang lo thung.
Thlirna Tawi
Copa del Rey - Quarterfinal
Barcelona vs Real Sociedad
1st leg: Sociedad 0 - 1 Barca
BAR: Neymar 21'
2nd leg: Barca 5 - 2 Sociedad
BAR: Denis Suarez 17', 82'; Lionel Messi 55' (P); Luis Suarez 63'; Arda Turan 80'
REA: Juanmi 62'; Willian Jose 73'