Aw ropui ber Federer

Roger Federer-a'n Grand Slam nomawi 18 a chawi ta! Swiss super star hian nimin tlai khan a vawi nga nana Australian Open nomawi chawi turin a elpui ber Rafael Nadal chu darkar thum leh minute 37 chhungin 6-4, 3-6, 6-1, 3-6, 6-4 in a hneh.

Rod Laver Arena-a inkhelah Nadal-a'n service hmasain 3-3 a nih hnuah Federer-a'n a break sak a, set a lakna tur game bikah vawi hnih aces siamin minute 34 chhungin a tlang. Player pa­hnih ten harsatna lian tham tawk lo a, set hnih ve ve an lak hnuah nomawi chawi tur chinfel nan deciding set khelh a ni.

Service ṭha bik nei Federer-a'n set hnuhnung berah service hmasa zawkin a hloh nghal! Nadal tan chakna turin kawng zau takin a inhawng nghal a ngaih a ni. Mahse, Federer hian a khingpui service vawi hnih break letin ropui takin hnehna a chang.

Kum 35-a upa Federer-a'n Australian Open bika a match 100-na a khelh nia a khingpui hi tharum ngah leh tlan tam Nadal ni mah se a service ṭhat a chhawr ṭangkai a, vawi 20 zet aces siamin Nadal hian vawi li bak a siam thei lo.

Federer hian 2007 leh 2008 Wimbledon final-ah khan aces vawi 24 leh 25 siam chungin Nadal lakah hnehna a lo chang tawh a, theihna sang leh mi bik pahnih inkhela danglamana thlentu chu service nei ṭhat a ni.

Grand Slam vawi 18 champion tawh Federer hi season hmasa Wimbledon semifinal-ah a chak loh ṭumin a hliam a, a khup na vangin nikum chawhnu lam zawng a inkhel thei lo. Season hmasa a inkhelh tam loh vang hian a ranking pawh a tla hniam a, tun ṭumah hian seeded 17-na a ni.

Champion nomawi chawi turin Federer hian match sarih a khelh aṭangin set sarih chiah a hloh a, final kalkawngah hian world number 10 chin player pali ngawt a hneh - a kum tam deuh tawh mah se a thiam ber a nih zia a lantir chiang hle.

Tennis khawvela player pahnih inelah chuan Federer leh Nadal te hi chanchin ngah leh khawvelin a dah san ber a ni. Tun ṭum hi vawi 35 an inhmachhawnna a ni a, Nadal hian record la nei ṭha zawkin 23 hnena a chang tawh. Aussies Open bikah hian Nadal hian kum 2012 leh 2014 semifinal bakah 2009 final khan a lo hneh tawh - sulhnu hlui sawi loin tun hi Federer-a tan hlimna hun a ni thung.

Champion châk Nadal
Kum 30-a upa Rafael Nadal chuan, "Tun dinhmun thleng tur hian ka thawkrim a, nomawi chawi tur hian ka theihtawp tak meuh meuh ka chhuah a, amaherawhchu kei aiin a la phu zawk cheu a ni ang. Tun ṭum hi pahnihna ṭum thum ka dawnna a ni a, thleng mawi tak ni mah se nomawi chawi phak hi ka duhthusam zawk a ni," tiin champion a châk thu a sawi hreh lo. Spanish tennis player ropui hian a khingpui Roger Federer a fak tel bawk.

Champion Federer
Australian Open 2017 champion Roger Federer chuan, "Sawi dan tur pawh ka thiam lo, Rafa nen hian hun ropui tam tak kan tawng tawh. Tun ṭuma final-a kan intawng hi chu mak kan ti ve ve ang, ani hi chu hneh lo ila lawm takin ka pawm ang. Tennis-ah chuan draw awm a thiang lo a, awm ngat se chuan Rafa nena hlim dun ka duh. Nadal a thawkrim a, kei pawh ka thawkrim a ni. Ka thawhpuite chungah ka lawm a, tun hun hi a thlen ka beisei lo a, a thleng si," tiin a lawm tih a chiang hle.

Federer-a'n Grand Slam a champion hnuhnung ber chu 2012 Wimbledon daih tawh kha a ni a, kum nga hnua a Grand Slam-a a champion leh thei hi a ropui a ni.