Grand Slam Lalnu Serena

Serena Williams chuan Grand Slam singles title 23 a la ta! Kum 35-a upa Serena hian Inrinni zan khan Rod Laver Arena-a inkhelah Venus Williams chu darkar khat leh minute 21 chhungin 6-4, 6-4 in a hneh a, Australian Open nomawi vawi sarih zet a chawina a ni bawk.

American super star Serena hian Grand Slam champion vawi 22 ni thei Steffi Graf chu nikum Wimbledon khan a nihrual tawh a, tunah chuan Open Era bika major title chawi hnem ber a ni.

Kum 1968 aṭang khan Grand Slam inelnaah hian professional player an tel phal sak an ni a, he mi hnu lam chin hi Open Era tih a ni. Tennis inelna pumpuia Grand Slam nomawi chawi hnem lamah chuan Margaret Court (24 titles) chiah Serena-i chungah hian a leng tawh.

Tunkar aṭanga world number 1 ni leh tur Serena hian kum 1999 US Open khan a vawi khat nan Grand Slam nomawi a chawi. Tennis inelna lian zual bik pali - Australian, French, US Open leh Wimbledon-ah te hian final vawi 29 khelin ṭum 23 a champion.