Reds tla - mualphona nge vanneihna?

Liverpool FC a zawnin vawi thum an chak tawh lo. Jurgen Klopp-a nauten Inrinni zan khan Anfield-ah Championship table mawng lama awm Wolverhampton Wanderers chu 1-2 a hneh loin FA Cup aṭangin an tla.

Ni hnih liam taa EFL Cup aṭanga Reds pet chhuaktu Southampton chu Arsenal-in 5-0 zetin an sawp a, inkhel dangah Chelsea leh Manchester City ten an khingpui awlsam taka an hneh bawk avangin Liverpool mualphona belhchhahin a awm.

Liverpool manager Jurgen Klopp-a'n Wolves hmachhawn turin an ṭhat dan berin player a rem lo a, inkhelh banah ngaihdam a dil.

German manager Klopp chuan, "An inpeih tawhah ka ngai a, mah se kan la inpeih si lo. Chhuanlam ka siam thei a, chu erawh ka duh lo. Tun hi inthiam lohna, lungawi lohna leh kan khelh dan vanga keimahni chunga thinrim hun a ni. Inkhel bikah chuan ka thiam loh a ni a, ngaihdam ka dil e," tiin insiam-ṭhat an tum thu a sawi.

Reds hi October 2012 hnua a vawi khatna atan Anfield-ah match zawnin vawi thum an chak lo. Klopp-a hote hian tun season-ah Premier League-ah chiah champion beiseina an nei tawh a, he inelnaah pawh hian hmahruaitu Chelsea point 10-in an pha lo.

Hetihlai hian squad nei chhah tawk lo Liverpool tan tuna vanduaina hi malsawmna a ni thei a, Africa Cup of Nations aṭanga Senegal an tlak tawh avangin Sadio Mane an chhawr leh thei tawh dawn. Premier Legue-a champion tuma Blues umtu Reds hi a hmaa umtu ai khan an ṭha tawh zawk ang.

Inkhel Results
Derby County 2 - 2 Leicester City
Liverpool 1 - 2 Wolverhampton
Tottenham Hotspur 4 - 3 Wycombe Wanderers
Oxford United 3 - 0 Newcastle United
Lincoln City 3 - 1 Brighton & Hove
Chelsea 4 - 0 Brentford
Rochdale 0 - 4 Huddersfield Town
Burnley 2 - 0 Bristol City
Blackburn Rovers 2 - 0 Blackpool
Middlesbrough 1 - 0 Accrington Stanley
Crystal Palace 0 - 3 Manchester City
Southampton 0 - 5 Arsenal