Goal nawr na lo AFC chak lo

Aizawl FC-in Khalid Jamil-a hnuaiah defensive game an khel a, I League kai thar Chennai City an hneh loh ṭumin a ṭhat lohna a lang.

Zirtawpni zan khan Mizo club-in Robin Charles Raja hote 0-2 in an hneh lo. Brazilian forward 'Tank' hminglem an vuah Marcos Vinicius-a'n minute 53-naah goal ṭha bik a khung a, injury time-ah substitute Lalramchullova penalty chawi chu Brazilian midfielder Charles de Souza-a'n a thun leh bawk.

Aizawl FC-in goal an chhuah hnuah si phurh sut tumin an nawr a, inkhelh ṭan tirh lama awmze nei loa ball an vawrh nasat avangin insiamṭhat an harsat a, an vanduai tel bawk. Syrian midfielder Mahmoud Amna goal khung tur keeper Abhra Mondal-a'n a dan sak a, Lalruatthara ball tauhin crossbar a per bawk.

I League inkhel dangah champion lai Bengaluru FC an chak lo nawn a, Zirtawpni zan khan Goa-ah Churchill Brothers 1-2 in an hneh lo. Blues captain Sunil Chhetri goal chu Churchill-in Anthony Anton Wolfe leh Chesterpoul Lyngdoh hmangin an lehthal a, hun tawp hmain Bengaluru defender John Johnson hnawhchhuah a ni bawk.

Inrinni zanah Shillong Lajong-in Aser Pierrick Dipanda Dicka goal hnih leh Chinglensana Singh goal hmangin Mumbai FC 3-1 in an hneh a, Thangboi Singto hote an muala match hnih khelhah an la chak ve ve.