Klopp-a flop chhunzawm zel dawn em?

Kum 1923 chu rei tawh tak a ni. Hetihlaia English football league sang bera champion chu tuna Championship club Huddersfield Town an ni a, Liverpool-in match li chhung a zawna Anfield-a hneh an tawn loh kum a ni bawk. Kum 94 zet a liam a, he thawnthu hlui duhawm lo tak ziak nawn thei dinhmunah hian Liverpool an ding mek!

Jurgen Klopp-a hnuaia ropuina rama chuan inbeisei Reds hian zanin dar 1:30-ah Chelsea an mikhual dawn a, hnehna an chang zo lo leh a nih chuan match li chhung Anfield-ah a zawnin an tlawm dawn tihna a ni - German coach Klopp an rawihtirh khan thawnthu hlui ziah nawn inbeisei mah se thawnthu a zawnga hriat nuam lo ber ziak nawn tur hi chuan an beisei kher lo ang.

January thla chhungin League Cup leh FA Cup aṭang­in Reds hnawhchhuah an ni tawh a, point 10 a an phak loh leh hmahruaitu ni mek Chelsea lakah hian an tlawm leh a nih ngat chuan Premier League nomawi pawh beisei chi a ni tawh kher lo ang - Champions League khelh chu an beisei ngam tur awmchhun a ni.

Manager ṭha ka ni - Klopp
Liverpool-in Anfield-ah match thum chhung ngam tawng tawh lo mah se Klopp chuan manager ṭha tak a la nih reng thu a sawi! Borussia Dortmund boss hlui chuan, "Kan match hnuhnung pathumah kan tlawm a ni mai thei a, mah se hei hian team ṭha tak kan nihna leh manager ṭha tak ka nihna hi a la bo chuang lo," a ti a, a inringtawk hle.

Klopp chuan tun hnaia an result vanga an hnual thu erawh pha duh loin, "Team ṭha kan nihna lakboin awm lo mah se kan rilru a hnual tih erawh phat rual a ni lo. Kan match hnuhnungah te khan thil ṭha sawi tur reng reng ka nei lo a, ka lawmna ber chu khang game duhawm lo takte kha an liam tawh hi a ni. Tunah chuan Chelsea laka hnehna chang turin kan intuai thar a hun leh tawh a, kan beiseina a mit tur a ni lo," tiin a la beidawng duh lo.

Kum 49-a upa manager chuan, "Kan result te avang khan ka beidawng lo a, nitinin a thar beisei reng theih a ni lo. Vawiinah hian beidawng tawh ni ila, hetah hian ka awm lo ang. Game thumah a zawnin kan chak lo a, a bak a awm lo. Game-ah kan tlawm a, kan nunah erawh kan tlawm lo. Season duhawm takin min la hmuak a, kan hmabak hi a êng a ni," a ti.

Sapui hliam hmaah
Reds-in match thum chhung a zawnin hneh tawng tawh lo mah se an mikhual tur Chelsea boss Antonio Conte erawh a ṭawng pawr duh lo. Italian manager chuan, "Liverpool hi sapui hliam tuar ang mai an ni a, Anfield-a inkhelh harsat zia ngaihtuah chuan an khelmuala match thum an tlawm zawn thei hi a mak takzet. Mahse, tun hma zawng ai khan Liverpool hi an hlauhawm dawn a, sapui hliam tuar hmachhawn tur kan nih avangin kan fimkhur a ṭul dawn a ni," a ti.

September, 2016-a Chelsea-in Liverpool an mikhual ṭumin Klopp-a naute an dingchang zawk a, mah se Italy manager hlui chuan Reds laka tlawm team nen chuan an danglam tawh thu a sawi. Conte chuan, "Reds nena kan inhmachhawn hmasaka ka thusawi kha inla hre reng ang. Anni chu team an ni tawh a, keini erawh kan la ni lo. Nasa takin hma kan sawn a, inrintawkna kan ngah em em bawk. Reds hian Stamford Bridge-a kan inkhelh ṭum ang khan min hmachhawn an tum a nih chuan an beisei sual ang," tiin hnehna chan ngei a tum hle.

Conte chuan sawi chhun­zawmin, "Anfield-ah hian ka la kal ngai lo a, players tan chuan he stadium ropui taka inkhelh hi duhthusam a nih ṭhin avangin ka vanduai thlawt a ni. Reds hian fan-te puihna nen Anfield-ah hian boruak danglam tak an siam thiam a, inkhelh a harsa dawn. Ka sawi fo tawh angin he team hi a tawp thlenga nomawi beisei ngam tur an ni," a ti.

Mane-a kir
Africa Cup of Nations khela Sadio Mane a thangbo hlanin Liverpool-in beisei an phak lo a, AFCON aṭanga Senegal an tlak hnua Liverpool lama kir tura Mane a inpeih meuh chuan Reds hian League Cup leh FA Cup an lo mangṭha fel der tawh a, match sarihah vawi khat chiah chak hmel an hmu - Mane an mamawh takzet.

Liverpool-in Senegalese forward an mamawh zia an hai lo a, nipui transfer bazar-a pound maktaduai 34-a an lei winger Gabon aṭanga hruai haw tur hian private jet an tir hial - Chelsea hmachhawn hman tir an duh. Mahse, Reds hian nimin khan an player fitness hi an enfiah a, Blues lakah hian inkhel bul a ṭan beiseiawm lo mah se mamawh huna hman theih tura a awm tal hi Kop ho tan chuan thu hriat nuam tak a ni ngei ang.

Wenger tel loin Arsenal
Premier League champion tum zingah Arsenal leh Totten­ham Hotspurs chu zaninah an inlan bawk ang. Gunners hian Burnley 2-1 a an hneh ṭuma a chet dan mawi lo avanga match li technical area a awm thei lo tura hrem manager Arsene Wenger tel loin Watford an mikhual ang a, Spurs hian khualmualah Sunderland an lenchilh thung ang.

French manager Wenger hian Southampton an hneh

ṭumin a hremna hmasa ber a tuar tawh a, Watford zawhah hian Chelsea leh Hull City lakah pawh bench ah a la ṭhu thei lo ang. Champion tum Gunners-in khelmual sira an manager tel loin eng nge an an zel dawn tih hi hriat châkawm chu a ni.