A chung berah Mizoram

Nimin khan SM Dev Stadium, Silchar-ah Mizoramin Silchar club Arunachal SS 5-1 in an sawp a, group hmahruaitu ni chungin 31st Captain NM Gupta Trophy semifinal an lut.

Group B pakhatna Mizoram hian semifinal-ah Group A pahnihna ASEB, Guwahati an hmachhawn dawn. Group A-ah hian Army Green chu hmahruaitu an ni a, semifinal-a an khingpui tur a la hriat loh. NM Gupta football semifinal hi February 2, Ninganiah khelh a ni ang.

ASEB leh Army Green te nimin khan goal awm loin an inhnehtawk a, point sarih ve ve an hmu a, hneh loh an neih loh avangin Mizoram khingpui tur Guwahati club hi pahnihna ni mah se khelhpui awlsam tak an ni lo ang. Army Green hi 2016 Durand Cup-a Aizawl FC hneha champion zui ta kha an ni.

Mizoram hian khawtual club Arunachal SS an hmachhawn hma hian ASC (Bangalore), ARC (Shillong) leh Assam Rifles (Shillong) te an hneh tawh a, Silchar club hneh turin harsatna an nei lo. Lalsangzuala Hmar hote tan hian V. Lalchhuanawma leh Israel Laldingngheta ten goal hnih ve ve khungin Lalrammawia'n goal khat a khung bawk.

Mizo tan Mizo

Mizoram manager Peter Lalzawmliana chuan, "Silchar Mizo bakah Silchar khaw ṭhenawm Naxatilla Mission Field leh Kabuganj Mision Field aṭang leh hmun hrang hrang aṭangin Mizo engemaw zat an lo kal a, ṭantu kan nghah tial tial avangin kan lawm hle a ni," tiin Vanglaini palai a hrilh.

Group Stage zawhna

Vawiin hian group match hnuhnung berah ARC, Shillong leh ASC, Bangalore te an inkhel dawn a, Group A aṭangin vawiina inkhel tur team pahnih bakah Arunachal SS ten beisei tur an la nei vek.

Team Dinhmun
Group A
Team Pld W D L GF GA GD Pts
1 Army Green 3 2 1 0 7 2 5 7
3 ASEB, Guwahati 3 2 1 0 3 0 3 7
2 TRAU, Manipur 3 1 0 2 2 4 -2 3
4 BSF 3 0 0 3 2 8 -6 0
Group B
Team Pld W D L GF GA GD Pts
1 Mizoram 4 4 0 0 12 2 10 12
2 Arunachal SS 4 2 0 2 5 8 -3 6
3 ARC, Shillong 3 1 1 1 2 2 0 4
4 ASC, Bangalore 3 1 0 2 5 6 -1 3
5 Assam Rifles, Shillong 4 0 1 3 1 7 -6 1