Basti goal - FA Cup champion lai an lawm

Manchester United-in FA Cup nomawi humhim tumin Pathianni zan khan fourth round-ah Wigan Athletic 4-0 in an hneh. Jose Mourinho naute tan hian Marouane Fellaini, Chris Smalling, Henrikh Mkhitaryan leh Bastian Schwein­steiger ten goal an khung.

Goal thum a luh hian Red Devils an chak chiang tawh a, chutihrualin goal lina hi a belhchhahna satliah a ni lo. Goal khungtu hi Schweinsteiger a nih miau avangin goal li lut zingah Germany captain hlui in overhead kick hmanga goal mawi tak a khung lai hian Old Trafford-a mipui pungkhawm thawm a ṭha ber.

Beidawng lo Basti

Dutch manager Louis van Gaal-a'n Bayern Munich aṭangin Schweinsteiger a thlem chhuak a, German footballer zinga United first team jersey ha hmasa ber ni mah se khelmual chhungah hming a chher thei lo. Season hmasa berah match 31 khelin goal khat chiah a khung.

Jose Mourinho hun a inṭan a, nikum nipui laia Ger­many-in Euro 2016-a inelna thlengtu France an hneh lohna chhana mawhphurtu German midfielder hawisan a ni. Basti hi first team zingah training phalsak a ni lo a, player hming langsar tak takin Portuguese manager an sel a, Germany captain hlui an vuipui bawk.

Thutharthehdarhtu lamin Basti hi inelna sang hmachhawn tlak tawh lote kalna hmun America lam pan turin an ziak a, German midfielder erawh a ngawi reng.

Kum 32-a upa Schweinsteiger hi U21 team leh mimal angin training nei mah se Mourinho emaw club emaw sawi chhe zawngin a ṭawng chhuak lo a, tunah a rah a lang ṭan.

March thla hnua a vawi khat nan November khan EFL Cup-ah United tan a inlan a, Mourinho hnuaia a khelhna hmasa ber a ni bawk.

Portuguese manager hnuaia a vawi khat nan Pathianni zan khan inkhel bul a ṭan a, Fellaini goal khung turin ball ṭha bik a vawrh luh bakah hun tawp hmain ama pualin goal a khung. Basti hian a goal khung hi a nupui tennis khelh chawlhsan tawh Ana Ivanovic tan a hlan tih hriat theih takin a lawm bawk.

Europa-ah Basti

Mou­rinho chuan, "Thla tam tak squad-ah a awm loh avangin Basti kan luhtir hi mak ti an tam ang. Amaherawhchu khatihlai khan kan zinga tel turin a thawkrim a, khelhna hun ṭha chang thei turin theihtawp a chhuah a ni. EFL Cup final vangin Manchester Derby inkhelh hun sawn a ni a, Morgan Schneiderlin leh Memphis Depay ten club an chhuahsan bawk avangin kan tlem hret a, Europa League-ah kan ziak lut ang," tiin thla thara Europa League knockout stage-a Saint-Etienne an hmachhawn hunah chhawr theih a nih tur thu a sawi.

Basti ṭang zel tura a duhthu sawi telin Mourinho chuan, "Khelhna hun pek a nih lohlai khan professional takin a che a, tunah pawh professional taka a khawsak zel ka beisei. Kan hmaah khelh tur a tam avangin thlan theih zingah a awm tawh," tiin chhawr a tum thu a sawi a, rinrawl erawh a la ni lo ang.

United tan lawmna

Jose Mourinho-a'n Hull City nen EFL Cup semifinal khel player pakua zet a thlak thei. Left back ṭha Luke Shaw a dam leh tawh a, ṭha tura beiseiawm Tim Fosu-Mensah a rintlak a, keeper Joel Pereira a vawi khat nan a inlan bakah defender Axel Tuanzebe chuan amah chher liantu Wigan boss Warren Joyce hmaah United tana a match hmasa ber a khel bawk.

Inkhelh ṭan hmain United tana goal khung tam ber Wayne Rooney chuan a record a chhuhsak tak Sir Bobby Charlton hnen aṭangin golden boot trophy a dawng.

Mourinho tan Championship club Wigan hneh hrim hrim thil ropui a ni lo a, amaherawhchu player tam tak thlak chunga harsatna nei loa an chak avangin lawmna tur erawh a awm.

Team 16 chu

Premier League club zingah Tottenham Hotspur, Arsenal, Chelsea, Manchester United, Burnley, Middlesbrough leh Manchester City ten FA Cup Last 16 an thleng tawh a, fourth round replay awm chhunah Leicester City leh Derby County te an inkhel ang.

Leeds United hnehtu Sutton United chu National League-ah daih an awm a, he division-a hmahruaitu Lincoln City an la dam bawk. National League chungah hian League Two, League One, Championship leh Premier League te an awm.

League One aṭangin Ox­ford United leh Millwall te awmin Championship aṭangin Wolverhampton Wanderers, Hud­dersfield Town, Blackburn Rovers leh Fulham te an awm bawk.

Nizan khan FA Cup Last 16 fixture hi pawh a ni a, intum tur kan hre hman lo. Pawisa thapna lamah chuan Chelsea leh Manchester City te chu champion tura rinkai an ni a, league lama dinhmun hniam ber Sutton United chu tum châkawm berah an ngai bawk.

Sutton captain Jamie Collins chuan, "Premier League club lian nena pawh fuh kan châk a, Manchester United, Arsenal te hi rilruah chuan a awm," tiin sawi tham law law club hmachhawn a duh tih a sawi. Last 16 hi February 17-20 chhunga khelh tura a ni.