Grand Slam atana siam mi bik Federer
Set nga chhung an inkhel a, khawvela amah el phak ve bertu lakah hnehna a chang. Roger Federer-a'n backhand ni loin forehand hmangain Rafael Nadal a hnehna point a vaw chhuak. Swiss tlangvalin Grand Slam nomawi 18 zet a chawi theihna chhan chu tennis khel tura thiamna neih ngai ang zawng zawng a neih kim vek vang a ni!
Pathianni zan khan kum 35-a upa Federer hian 6-4, 3-6, 6-1, 3-6, 6-3 in Nadal a hneh a, Rod Laver Arena-ah a vawi nga nan hnehna hlado a chham.
Kumin Australian Open hma hian Federer-a'n Wimbledon nomawi a chawi hnuah kum nga a liam tawh a, Grand Slam final bika Nadal a hneh aṭangin kum 10 zet a ni tawh bawk - tennis khel tura mi bik hian a kum tam hnuah attacking tennis hmuhnawm lantirin backhand smash, half-volley leh jump smash a thiam bikzia a pholan hnua nomawi a chawi leh hi a mak lo.
Harsatna karah
Kum 2016 July thla a ni a, khawvela tennis inelna ngaihhlut ber pakhat Wimbledon semifinal-ah Federer leh Milos Raonic-te an inhmachhawn a, set nga an khelh hnuah Canadian tlangval Raonic-a'n hnehna a chang. Hemi ṭum hian Federer-a'n hliam a nei a, a khup veilam hi zai niin nikum khan a inkhel zui tawh lo.
Federer hian a hliam dam hnuah pawh inelna a hmachhawn nghal mai lo a, hei hi hun rei zawk inkhelh a duh vang niin a sawi. Nikum October thla khan Nadal-a'n Spain-ah tennis academy a hawng a, he hunah hian Federer pawh inlanin khatih hunlaia hliam vanga chawl ve tho Nadal chu dam thuai tura a duhsak thu a sawi.
Nikum chhung khan Nadal hi a inkhel leh hman a, US Open leh Rio Olympic-ah a hmel kan hmu a, Federer erawhin Australian Open hma khan Hopman Cup-ah Swiss aiawhin a inlan ve zeuh tih bak chu tournament a khel lo.
Grand Slam tournament hmasa ber khelh ṭan a ni a, Federer hi season hmasa a inkhelh tam loh avangin seeded 17-na a ni phak hram. Final thleng tur hian top 10 player chin Tomas Berdych (10), Kei Nishikori (5) leh Satn Wawrinka (5) te a paltlang a ngai a, final-a a hneh pawh seeded pakuana Nadal a ni - nomawi chawi tura a kalkawng hi ṭum dang zawng aiin a harsa zawk.
Federer chuan, "Final kan khelh hma khan nuam leh zalen takin ka inkhel tur a ni tiin keimah ka infuih a, ka coach Ivan Ljubicic leh Severin Luthi te nen khan ka khingpui ni loin ball chauh ka ngaihtuah theihna turin kan sawiho bawk," a ti. Federer hian vawi 35 an inhmachhawn tawha vawi 12 hnehna chang turin taksa bakah rilru a inbuatsaih nasa hle tih a chiang.
A ropui ngei e...
Tennis inelna lian leh ngaihhlut pali Australian Open, French Open, Wimbledon leh US Open-ah Federer hi a champion kim vek tawh a, clay court hmanga inelna Roland Garros-ah vawi khat chiah la champion mah se a dang pathumah chuan vawi nga a champion tling vek a, Wimbledon bikah phei chuan vawi sarih a champion - a thlen chin ang hi tuman an la tawng ve lo, tuma tluk loha leng a ni.
Federer chuan, "French Open nomawi kha ka nghak a, ka bei a, ka hlawhchham a, chumi hnuah ka bei leh pawhin ka la hlawhchham leh. Chumi hnuah hnehna ka chang ve chauh," a ti. Federer hian French Open final-ah Nadal hi ṭum li zet a hneh loh hnuah kum 2009 khan Robin Soderling hnehin a champion ve chiah.
Tennis chungchang sawi chhunzawmin, "Infiamna chi hrang hrang zingah chuan Tennis hi a hautak berte zinga mi a ni a, kan khingpui tur ber pawh hriat lawk mai theih a nih ṭhin loh avangin inbuatsaih thiam a har ṭhin hle. Player zawng zawngin an thawhrim thu an sawi a, kei pawhin an tih ang tho khan ka ti ve bawk," tiin hlawhtling tura thawhrim a ngaih thu a sawi tel.
Thlirna
Federer leh Nadal te pahnihin Grand Slam nomawi an chawi zat belhkhawm hi 32 zet a ni a, tennis player pahnih inel bikah chuan chanchin ngah leh ngaihnawm ber an ni chiang. Novak Djokovic, Andy Murray leh Stan Wawrinka te hi nomawi chawi thei tura theihna nei sang tak ni vek mah se Federer leh Nadal te hunlai an nan ve phak miau avangin an ropui tur angin an ropui tawk lo. An tan chuan player ropui pahnihte hi anchhia ang mai an nihna chen a awm a, chutihrualin an ropuina belhchhah saktu an ni thei bawk.
Boris Becker leh Michael Chang te khan kum 17 mi an nih laiin Wimbledon leh French Open nomawi an lo chawi tawh. Pete Sampras-a'n beisei loh hnuah 2002 US Open final a lut leh bawk. Goran Ivanisevic chu 2001 Wimbledon-ah khan wildcard hmanga inlan ni mah se khawvel barakhaihin a champion. Tennis khawvel-ah thil mak leh chhinchhiah tlak tam tak a lo thleng tawh. Kum 35 a tlin hnua Federer-a'n Melbourne-a hnehna a chang leh hi tennis khawvelah chuan kumkhaw sawi a tling tawh ang.
Football pet turin Lionel Messi leh Cristiano Ronaldo an awm a, basketball khel turin Stephen Curry leh LeBron James te an awm bawk. Federer leh Nadal ten tennis khawvel an thunun dan lah sawi ngaihnawm chawp ngai loa ngaihnawm sa a ni - infiamna kawng hrang hranga player ropui bikte inel lai hmu leh chhiar theitu kan ni hi kan vannei a ni.
Grand Slam champion hnem te
Title Career Player Ram
18 (2003-present) Roger Federer Swi
14 (2005-present) Rafael Nadal Spa
14 (1990-2002) Pete Sampras US
12 (2008-present) Novak Djokovic Ser
12 (1961-1967) Roy Emerson Aus
11 (1974-1981) Bjorn Borg Swe
11 (1960-1969) Rod Laver Aus
10 (1920-1930) Bill Tilden US