India chakna Jasprit Bumrah
Pathianni zan khan India leh England chuan Twenty20 series match thum an khelh tura match hnihna an khel a, mualneitu team hian final over-a fast bowler Jasprit Bumrah chet ṭhat chhawr ṭangkaiin England chu run ngain an hneh.
T20 series match hmasa berah England-in hnehna an chan tawh avangin team pahnih hi 1-1 in an inhnehtawk mek a, February 1 zanah series match hnuhnung ber an khel dawn - a chak zawkin nomawi an chawi ang.
Nagpur khawpuia inkhelah India an bat hmasa zawk a, over 20 chhunga run 144 vaw chhuakin mi pariat an out. India tan captain Virat Kohli chuan run 21 chiah siam mah se a opener pui KL Rahul che ṭhain run 71 zet a vaw chhuak a, Indian batsman zinga run siam hnem ber a ni.
England-in an target umphak ngei tumin bul ṭan mah se veteran bowler Ashish Nehra an ngam lo a, kum 37-a upa fast bowler hian England opener pahnih Jason Roy leh Sam Billings te chu run 15 pawh an siam tlin ve ve hmain a vawm out. Mikhual team tan Joe Root (38 runs) leh Ben Stokes (38 runs) te che ṭha thawkhat viau mah se inkhel tawp lam chu 'Bumrah' channa a ni.
Ball ruk chiah a awm tawh tiha England run mamawh zat chu run riat a ni a, chak turin mikhual team dinhmun a ṭha a, Bumrah kutah India a innghat. Kum 23-a upa bowler hian Root leh Jos Buttler a vawm out a, England an ding chhuak zo lo - over 20-ah run 139 siamin mi paruk an hloh a, India an chak.