Barca tawlhthluk zanah Real an tho
Real Madrid-in an match hnuhnung pangaa hnehna an chan zawh loh hnuah chak hmel hmuin an tho ve leh ta - Zinedine Zidane-a naute hian La Liga a an hmahruaina sawhnghet turin Pathianni zan khan Real Sociedad chu 3-0 in an sawp. Real lawmna belhchhah turin tlarhma lama an buaina Cristiano Ronaldo leh Alvaro Morata te chuan goal an khung.
Barcelona-in Real nena an inkar tizim turin hun ṭha nei mah se an chhawr thei lo a, khualmualah Real Betis chu goal khat ve ve khungin an inhnehtawkpui. Sevilla pawh an bang bik lo - Jorge Sampaoli naute hian khualmualah Espanyol chu 3-1 laia an ngam loh avangin pathumnaah an tawlhthla a, Barca chu pahnihna an ni.
Hei le Real
Real Madrid-in a zawna match nga hnehna an chan zawh loh hnuah chak duhin an tuihal leh tawh tih khelmual chhungah an tarlang a, a tuartu chu Real Sociedad an ni. Inkhel ṭantir aṭanga minute 38-naah Real hian goal an khung ṭan a, Ronaldo chuan Mateo Kovacic tan La Liga-a a goal hmasa ber a siamsak.
Croatian midfielder hian ball ṭha siamsaktu Portuguese forward a theihnghilh lo a, minute 51-naah Real thiampuipa tan hian a siamsak ve leh. Santiago Bernabeu-a inkhelah Sociedad an talbuai chhunzawm a, defender Inigo Martinez chu yellow card pahnihna a chawi avangin minute 74-naah hnawhchhuah a ni.
Real-in inkhel an thunun chhunzawm a, Alvaro Morata chuan minute 82-naah Lucas Vazquez ball cross chu tauh lut ve lehin Real an chak chiang hle.
Zidane thukhawchang
Real Madrid coach Zinedine Zidane chuan, "Bernabeu-a min ṭantu kan fan-te chungah lawmthu ka sawi a, hnehna kan chan ngei theih nan min pui ṭha hle a ni. Hun harsa tak kan tawn hnuah hnehna kan chan avangin ka lawm a, team hriatthiam harsa tak lakah nuamsa takin hnehna kan chang thei a, a pawimawh ber chu goal kan chhuah lo kha a ni," a ti.
Barca an vanduai
Real Betis khelmualah point khat hlawh chhuak turin Barcelona-in minute 90 nghah thlen ngai mah se an goal khung pawm sak an nih loh avangin Catalan club hi team vanduai zawk chu an ni. Inkhel pumpui thlir erawh chuan beisei lo taka inkhel thununtu chu Betis an ni a, Dani Ceballos leh Ruben Castro ten woodwork an pet per ve ve.
Betis hian minute 75-naah Alex Alegria hmangin goal hmahruai an khung ta nge nge a, Barcelona an barakhaih chiang hle. Betis an vanneih chhunzawm a, defender Aissa Mandi-a'n Aleix Vidal ball cross goal line pelh aṭanga a pet chhuah chu goal hman ngei mah se referee-in a pawm lo - La Liga-ah goal line technology hman a la nih loh avangin referee thutlukna pawm mai loh chu Barca tan tih theih a awm lo.
Barca an vanduai reng bik lo. Minute 90-naah Luis Suarez a inlar a, Uruguayan striker hian Lionel Messi hnen aṭanga a ball hmuh chu an si phurh sut nan a hmang. Goal dang khung tur erawhin hun a tam tawk tawh lo a, 1-1 in team pahnih hi an ṭin.
Enrique-a phunnawi lo
Barca boss Luis Enrique chuan, "First half-ah khan goal hlauhawm tak an nei thei bik lo a, mah se keini pawh chutiang tho chu kan ni. Chawlhlawk hman a nih hnuah erawh an khel ṭha em em a, min nawr reng avangin ball pawh kan in pass dik thei lo. Minute 60 chhung chu Betis kha an khel ṭha zawk a, ka ngaihdanah chuan point hnih hloh niloin point khat hlawh chhuak kan ni," a ti.
Enrique chuan referee thutlukna sawisel duh loin, "Referee te hian a chang chuan puitu an mamawh ṭhin a, tunlai thiamna mila technology hman ve mai pawh hi a ṭulin ka hria," a ti a, goal chu referee tan hmuh hman vek a nih loh thu a sawi.