Ka hlutna a bo lo - Usain Bolt

Olympic medal pakua a dawn tawh zinga pakhat chu chhuhsak ni mah se Usain Bolt chuan infiamna khawvela a sulhnu chu a bo chuan loh thu a sawi chhuak.

Kum 2008 Beijing Olympic khan Jamaica team chuan 4x100m relay-ah gold medal an dawng a, an team zinga pakhat Nesta Carter chu damdawi hman phal loh a hmang tih hmuhchhuah a nih avangin an medal hi hlihsak an ni.

Medal an hlihsak hlimah Bolt a ngawi a, zawhna leh thu lengvak a tam tak avangin khawvela tlan chak ber a ngawi tluan thei lo.

Kum 30-a upa Bolt chuan, "Ka medal dah let a ngai hi a hrehawm ka ti takzet. Ka lungngai hle a, mahse hei chu hringnuna thil thleng ve thei pakhat a ni. Thil dang tam tak ka tawng tawh a, intlansiak huang chhunga ka sulhnute hi a ropuina a la nep chuang lo," a ti.

Bolt chuan sawi chhunzawmin, "He thil thleng chungchangah hian tumah dem a sawisel ka tum lo. Nesta nen hian high school aṭangin kan inhre tawh a, eng harsatna leh buaina pawh thleng se ani nen hi chuan ṭhian kan ni reng ang," tiin a sawi.