Juve-in hmahruaina sawh nghet
Italian Serie A champion chuan league hmahruaitu an nihna sawh nghet turin Pathianni zan khan khualmualah Sassuolo 2-0 in an hneh, inkhel dangah AS Roma chu Sampdoria lakah 3-2 a an tlawm avangin Turin club hian point liin hma an hruai fal ta.
Stadio Citta del Tricolore-a inkhelah Alex Sandro cross chu Gonzalo Higuain-a'n minute kuana lekah a khung nghal a, Paulo Dybala thawhrah sengtu Sami Khedira chuan an goal hnihna a khung bawk.
Season hmasa khan Higuain hian Napoli tan league match 35 a khelh aṭanga goal 36 khungin kum 66 zet record lo awm tawh season khat chhunga Serie A goal khung hnem ber chu a khum a, nipui transfer lai khan an elpui Juventus hi a zawm. Turin club tan pawh Argentina internatioal striker hian goal a khung chhunzawm zel, tun season-ah goal 15 a khung leh der tawh.
A zawna season ruk chhung league champion nih tum Juve hian point 51 hmuin hma an hruai chunzawm zel a, an hnuai chiaha awm Napoli aiin match khatin an khel tlem zawk bawk.
Inkhel dangah a zawna league match nga chhung hnehna chang tawh Napoli chu an mikhual Palermo nen 1-1 in an inhnehtawk a, Europe-a inlan tum AC Milan erawh Udinese lakah 2-1 a tlawmin hmalam an pan thei rih lo.