Dan theih loh Egypt-in Morocco hneh

Africa Cup of Nations record nei ṭha ber Egypt chuan minute 87-naa substitute Mahmoud Abdel-Moneim goal khung hmanga Morocco 1-0 a hnehin semifinal an lut.

Pathianni zan khan vawi sarih champion tawh Egypt tan hian Mohammed Salah goal khung tur ṭum hnih chu Munir Mohamedi-a'n a dan sak a, Morocco defender Romain Saiss leh midfielder Mbark Boussoufa te chuan cross bar an tih per bakah Aziz Bouhaddouz chuan yard hnih leka hnai aṭangin a pet goal lo bawk!

Inrinni zanah Egypt hian semifinal an khel lehnghal dawn a, qurterfinal-a Tunisia 2-0 a hnehtu Burkina Faso an hmachhawn ang a, semifinal lehlamah Ghana leh Cameroon te an inkhel dawn bawk.

Quarterfinal inkhel pakhat zawka Ghana damna chu Ayew unau an ni. DR Congo 2-1 a an hnehna inkhelah Jordan Ayew chuan goal hmahruai khungin West Ham forward Andre Ayew chuan chakna goal a khung bawk - Congo goal neihchhun hi Paul-Jose M'Poku khung a ni thung.