Jerry-te tel loin DSK rawn thleng

Nilaini tlaia Aizawl FC khingpui tur DSK Shivajians chuan nimin khan Aizawl an rawn thleng a, chhum zin nasat avangin thlawhtheihna a ṭum thei lo a, an la thleng kim lo.

DSK Shivajians coach Dave Rogers bakah Mizo player pathum Sai­ruat­kima, Ricky Lallawm­awma leh K. Lalṭhathanga te rawn thleng zingah an tel.

Player 12 vel zet Guwahati-ah an la awm a, chung zingah chuan Jerry Lallianzuala, Jerry Mawihmingthanga leh Lallianzuala Chhangte bakah foreigner pali Juan Quero Barraso, Sasa Kolunija, Kim Song Yong leh Shane McFaul te an awm avangin Pune khaw club tan chanchin lawmawm loh a ni.

Dave Rogers-a hote hian Mumbai FC leh East Bengal hneh lo mah se Chennai City an hneh thei a, Mohun Bagan leh Churchill Brothers lakah point khat ve ve an hmuh bawk avangin Mizo club tan an awlsam lo ang.

Aizawl FC leh DSK inkhel ticket hi Rs 50 a ni a, hengahte hian a lei theih ang.

1. Aizawl FC Merchandising Centre (Bazar Bungkawn)

2. Raw Digital, Near Vanglaini Office, Zarkawt

3. Stalwart, Opposite Mission Veng Bus Stand.

4. Din Din Pharmacy, Khatla.

5. Emanuel Store, Near Greenwood Hospital, Bawngkawn.

6. Carz Spa, Millenium Centre, Motor silna