FA Cup final Chelsea vs Liverpool: Tu nge ropui zawk dawn?

Season hmasa lawkah European champion an ni a, tun season-ah erawh eng nomawi mah chawi loa season khar thei dinhmunah an ding mek - chu chu Chelsea an ni.

Quadruple an beisei a, mahse, Premier League nomawi beiseina erawh a thamral ṭan meka sawi ngam a ni. League Cup-ah an champion tawh a, FA Cup leh Champions League hi an la beisei a ni thung - chu chu Liverpool an ni.

Zanin dar 9:15-ah FA Cup final-ah Chelsea leh Liverpool an inkhel dawn a, Blues-in an season duhawm lo thup mawi nan champion an mamawh a, Reds-in champion an duh ve tho bawk.

Jurgen Klopp-a team hian League Cup tih loh nomawi dang chawi ta lo se, season satliah ang taka sawi theih a ni dawn - Liverpool tan season hriatreng tlak hnutchhiah turin FA Cup-ah champion a ngai.

Team 'intiat' tawk
Tun season-ah Chelsea leh Liverpool hi vawi thum an intawng tawh a, minute 90 chhunga chak zawk an awm lo - inkhel a hmuhnawm dawn tih a chiang a, Wembley Stadium thawm a ṭha khawp ang.

Anfield-a team pahnih an intawn hmasakin 1-1 in an inhnehtawk a, Stamford Bridge-ah thawnthu a danglam tam lo. Goal hnih ve ve khungin an inhnehtawk leh a, chak zawk an awm lo.

February 27-ah khan League Cup final khelin team pahnih an intawng leh a, minute 90 chhungin goal an khung lo. Minute 30 dang an khel leh a, an la inhnehtawk cheu!

Penalty shootout hmangin champion tur zawk zawn a ni a, player 10-in an pet goal ve ve vek hnuah goalkeeper pahnih pet tir an ni a, Chelsea keeper Kepa Arrizabalaga pet goal loh zarah Liverpool an champion.

Ṭhat dan ber!
Liverpool boss Jurgen Klopp-a'n, "Kan ṭhat dan bera khelh chhuah a, nomawi rawn hawn kan duh a ni," tiin a sawi a, mahse, German coach hian an ṭhat dan berin a team a rem thei dawn lo.

Reds-in season duhawm an hman theih nana player thawhhlawk em em Fabinho chu hliam vangin a inlan theih a rinawm lo a, lehlam pawl goal nawr tur chhu chat ṭhintu midfielder tel loin Liverpool an pan sawt dawn.

Chutihrual chuan midfield-ah Naby Keita, Jordan Henderson leh Thiago Alcantara an inkawp thei dawn tho a, han mangan viauna tur awmin a lang lo.

Tlarhnung lamah Andy Robertson, Virgil van Dijk, Ibrahima Konaté leh Trent Alexander-Arnold an din theih a rinawm a, Konate aiah Joel Matip chu lut thei a ni bawk.

Final inpuahchahna
Season khata Champions League, FA Cup leh League Cup final lut vek thei coach hmasa ber Klopp-a'n an league match hnuhnung berah FA Cup final an khelh tur a ngaihtuah tel tih a lang a, Hendo leh Thiago te bench-a a dah bakah Mohamed Salah pawh bul a ṭantir lo.

AFCON final-a an tlawm hnua Reds tana ngai la awh leh lo Salah hi zaninah bul ṭan tura ngaih a ni a, Liverpool fan-ten Egyptian forward lakah beiseina an nei sang ang.

Sadio Mane chu bul ṭan chiang tura ngaih a ni a, Villa laka khel tluan Diogo Jota aiah Luis Diaz a lut a nih pawhin a mak lo ang - Roberto Firmino a dam tawh bawk.

Klopp chuan, "Engtiklai pawhin kan team chu an inpeih reng a, hei vanga final khel tur pawh kan ni," a ti a, kut ruaka Wembley hawsan a tum lo - thei tak maw?

Chelsea beiseina
Thomas Tuchel hoin European champion an ni a, pangngai takin season an hmang bawk. Mahse, Russia sorkarin Ukraine a run avangin Chelsea an buai ta thut - a mak tiraw?

Blues neitu Roman Abramovich hi Russia president Vladimir Putin ṭhian hnai tak a ni a, hei vang hian Russia chet dan demtu UK sorkarin Abramovich hi an ram chhunga a thil neihte khawih che thei lo turin an hrek.

Russian sumdawng hausa hian Blues a zuar zui a, Chelsea sum leh pai che vel thlenga a buai tel avangin a nghawng chu khelmual result a ni - London club hi an league match hnuhnung pariatah vawi thum chiah an chak a, vawi thum tlawmin, vawi hnih draw an nei.

Chelsea ang club tan chuan tun hnai an result hi a ṭha tawk lo a, siamṭhat ngai tam tak a awm. Mahse, an league match hnuhnung berah 3-0 a Leeds United an hneh avangin an boruak zuai lutuk tur a kang ve deuh.

Chelsea buaina
Todd Boehly leh a thawhpuiten Chelsea an lei fel tawh a, Abramovich hnuaia an buaina pakhat chu chin fel a ni. Mahse, heti chhung hian buaina tam tak a la awm.

Abramovich hrem a nih hma khan Chelsea-in khawvela defender hlawh hnem ber ni turin Antonio Rudiger an thlem a, mahse, Real Madrid a pan dawn.

Centre back Andreas Christensen leh captain Cesar Azpilicueta meuh pawh Barcelona pan tur anga sawi an ni a, American winger Christian Pulisic leh Romelu Lukaku te an hlim lo a, midfielder Jorginho leh N'Golo Kante te contract a zo hnai bawk.

Chelsea-in chinfel tur tam tak an nei a, chutiang kara team form leh inlungrual Liverpool hmachhawn hi a hautak dawn - mahse, he team hian coach atan Tuchel an nei miau a, champion aia hniam an ngaihtuah lo ang.

Kovacic Out!
Chelsea-in Leeds United laka inhliam Mateo Kovacic an chhawr thei dawn lo a, Croatian midfielder awm lo tur hi Blues tan a pawi thui thei - chanchin lawmawm dang an nei thung.

Midfielder N'Golo Kante-a'n dam lam a pan a, Liverpool lakah bul a ṭan thei a nih ngat chuan French midfielder hi khelmuala danglamna thlen thei khawpa player thiam bik a ni.

Mahse, Tuchel chuan, "Midfield-ah Jorginho leh Ruben Loftus-Cheek an inkawp ang tih hi 90% in a chiang," a ti a, Liverpool ṭantute tan Kante dam thu hriat ai chuan a nuam ang.

Tlarhmaah Mason Mount, Kai Havertz leh Lukaku an inkawp rin a ni a, Blues tlarhmaah tun season-a goal 15 aia tam khung an la awm loh avangin Liverpool tlarhnung su hawng turin an ṭha tawk em, tih chu a hriat thuai dawn.

Final - May 14, Inrinni Zan
Chelsea 9:15 PM Liverpool