Man City hmaa ding tur West Ham

Manchester City-in Premier League match hnuhnung pangaah goal 22 an khung a, chiang takin hnehna an chang vek. Pep Guardiola hote hian champion turin match hnih khelh hmabakah point li an hmuh a ngai a, Pathianni zan dar 6:30 hian West Ham United an hmachhawn dawn.

Tun hnaia Man City khelh dan thlirin Hammers lakah point thum hmu mai tur an ni a, London club tan Kevin de Bruyne telna team hi dan a harsa dawn. Belgian midfielder KDB hian match hnuhnung berah goal li a khung. Tun season league-ah goal 15 khungin assist vawi sarih a nei tawh a, tun hnaiah a vul lehzual avangin en bik hlawh tur a ni.

Pep-a hote hian Etihad Stadium-ah West Ham hi 2-1 in an hneh tawh a, London Stadium-ah chak tura rinkai zawk an ni bawk. Amaherawhchu football-ah thilmak a thleng ve chawk a, Hammers hi an muala khel tur an nih bawk avangin City tan a chetsual theih.

Premier League champion hi hliam vangin tlarhnungah an buai mek bawk. Ruben Dias, Kyle Walker leh John Stones te chu hliam vangin an khel thei dawn lo a, Wolves an hneh ṭumin Aymeric Laporte leh a kawppui Fernandinho te chu hliam vangin an la chhuak. Hammers lakah inhliam damkawr Nathan Ake chiah chu centre back pangngai dam ṭha a awm a, David Moyes leh a hote bakah Liverpool ṭantute tan chanchin ṭha a ni thei ang.