Zanin dar 7-ah I League final

Tun season I League hmawr bawkna tur chu champion zawnna a ni dawn. Zanin dar 7:00 hian Salt Lake Stadium-ah Gokulam Kerala leh Mohammedan SC te an inkhel ang a, heta chak zawk hian nomawi an chawi ang.

Pakhatna dinhmun luahtu Gokulam-in hun ṭha an bawhpelh a, Sreenidi Deccan an hneh loh avangin Kolkata club-in beiseina an neih phah. Chutihrualin Kerala club hi point thuma an la san zawk avangin champion turin draw a tawk.

Gokulam hi Armed Veng midfielder Zodingliana Ralte khelhna a ni a, Mohammedan-ah Mizo panga Brandon VL Remdika, Lalramchullova, Zothanmawia, Malsawmzuala leh Lalramhmunmawia te awmna a ni thung. Tu zawk pawh champion se Mizo tlangvalin I League nomawi an chawi ang.

Tun ṭum inelna hi Mizo tan a chhinchhiah thlak hle. I League final awm theih chhan hi Mizo tlangvalte vang a ni a, Sreenidi-in Gokulam 3-1 a an hneh ṭumin Lalromawia'n hattrick a siam. Samlukhai tlangval goal thum zinga goal hnih Mizo tlangval pahnih Lalchungnunga leh Vanlalbiaa Chhangte siamsak a ni.

Hei chauh hi a ni lo, Moham-medan-in nomawi beiseina an neih theih nan Brandon VL Remdika'n goal hnih a khung. Hunthar tlangval hian Gokulam-ah pawh hmun pawimawh a chang dawn. Kolkata club keeper hi T. Mawia a ni a, Dinthar FC leh Aizawl FC keeper hlui niin tawnhriat a nei ṭha hle.

Mohammedan hian I League-a Aizawl FC leh East Bengal champion pui tawhtu Lalramchullova an kawl a, Kolkata club hi an champion a nih chuan a vawi thum nan I League nomawi a chawi ang.