Mikel Arteta enkawl Arsenal chu Tottenham Hotspur luhchhuah tumin an zin chhuak a, an mikhualna ramah Antonio Conte enkawl Spurs chuan 3-0 in an lo sawp - season thar atana Champions League hmun ruak inchuh boruak a nung zual.
Arsenal hian hnehna chang se la chuan UCL ticket an nei fel ang. Mahse, an thil tum hi Tottenham thil tum nen a letling thawk. Harry Kane-a goal hnih leh Son Heung-min hmangin an lo hneh a, an inkar chu point khat lekah an sawr zim ta.
North London club hian khelh hmabak pahnih ve ve an la nei. A fawng chelhtu chu Gunners an la ni a, an chesual zeuh a nih erawh chuan Conte naute hian an hun ṭha an bawhpelh lo ang, match hnuhnung ber thlengin a pawimawh dawn.
Spurs an ṭha zawk Ningani zan inkhelah Arteta-a'n Son Heung-Min veng turin Cedric Soares a thlang a, a thlang sual. Portuguese defender hian minute 22-naah Son a tih tluk avangin penalty a chawi, striker Kane-a'n a khung nghal.

Ben White aia lut Rob Holding a talbuai. English defender hian Son ven hneh a tum lutuk a, a tum luatah a chesual. Ṭul lo takin South Korean international hi a titlu a, minute riat inkar lekah yellow card pahnih a hmuh avangin an hnawt chhuak.
Spurs an phur laklawh, corner aṭanga ball kal Rodrigo Bentancur-a tauh pial chu hnai zetah Kane-a'n a tauh lut a, chawlhlawk hmain chak tur a chiang, second half-ah Son chuan season kal laia a league goal 21-na khung lehin chak a nemnghet.
Conte naute hian tla chiang tawh Burnley leh Norwich City an hmachhawn leh dawn. Arsenal erawhin tun hnaia insiamṭha Newcastle United leh tlak hlaua la awm Everton an tum dawn, an boruak a la inthlak leh thei.
Arteta a lawm lo A naute khelh danah Mikel Arteta a lawm lo hran lo a, chutihrual chuan match official chet danah erawh a lungawi lo - tunah chuan an match hmabak khel tura inbuatsaih nghal an ngaih thu a sawi tel bawk.

Arteta chuan, "Match an enkawl dana ka ngaihdan sawi ni ila, thla ruk chhung hrem ka ni hial ang. Zep tur a awm lo, a lungawi thlak loh a, ka rilru chhungril leh ka hmuh dan sawi lan vek erawh a rem lo thung.
"Inkhel mawi leh hmuhnawm kha referee thutlukna ṭha loin a tichhia, theih ni se chuan camera hmaah min sawifiahsak se ka duh. Thutlukna erawh tih danglam theih a ni tawh lo. Ka naute khelh dan kha duhthusam ni lo mah se an chhuanawm ka ti," a ti.
Conte-a'n a chhang Inkhelh hmain Conte-a'n Arteta a fak a, a team din dan leh hmasawn dan a sawi. Inkhelh banah erawh Spanish manager hi a dim tawh lo, sawisel tur ringawt zawng lo turin a kap let, dawnsawn nuam tak a ni tawh lo ang.

Tottenham manager Conte chuan, "Sawisel tur a hre thei em em a, a zawng ngar ngar emawni tih mai tur a ni. Sawisel tur ringawt zawng loin a naute khelh danah a rilru pe nasa zawk rawh se," tiin Arteta chungchang zawhna a chhang.
Italian manager chuan sawi zawmin, "Khelh hmabak match pahnih kan la nei, kawng hi zau takin a la inhawng a ni. Kan thawhrimna chuan inrintawkna min siamsak bawk," tiin an elpui team chu chesual turah a ngai, boruak a vaw lum thiam hle.
Spurs hian Pathianni tlaiah Burnley an mikhual lehnghal dawn a, Clarets hi tla thei dinhmuna an din avangin team pahnih inkhel tur hi a hmuhnawm khawp ang.