Aguero lim an tlangzarh

Manchester City chuan Premier League nomawi an chawi hmasak ber aṭanga kum 10-na champhaah chakna goal khungtu Sergio Aguero lim chu Etihad Stadium kawtah an tlangzarh.

Kum 10 liam taa thil thleng kha Premier League history-a chanchin ngaihnawm ber zinga mi a ni. Roberto Mancini enkawl Manchester City leh Sir Alex Ferguson-a kaihhruai Manchester United te chuan season match hnuhnung ber khelh hmain point 86 ve ve an hmu.

Man United-in Sunder-land 1-0 in an hneh a, inkhelh a zawh hian Etihad Stadium-ah QPR-in City lakah 2-1 in hma an hruai mek. Sir Alex leh a hoten nomawi chawi turah an inngai a, mahse injury time minute hnihnaah Edin Dzeko-a'n siphurh a sut. Hetah hian a la tawp lo, minute hnih hnuah Aguero chuan chakna leh champion-na goal a khung.

Champion-na goal hi minute 93:20-naah a lut a, "Agueroooooo" tia comentator Martin Tyler a au chu tun thlengin a lar zui. Aguero hian champion-na goal a khung ringawt lo a, City tan hian goal 260 khungin club tana goal khung tam ber record a siam.