TNT hnehtu Tuichangral

An match hmasa berah chak lo mah se Tuichangral an tho chhuak. Aizawl khawpui pawn aṭanga Zothan Autoworks Pro Volleyball League khel awmchhun hian TNT chu 25-21, 14-25, 25-21, 25-23 (3-1) in an hneh.

Ningani zan R. Dengṭhuama Indoor Stadium, Mualpuia inkhelah Sahil Kumar a langsar. D3 Business Player of the Night atana thlan Sahil hian TNT lakah point 43 zet a hlawh chhuak a, danglamna thlen thei tura an lakluh ang ngeiin a team a chakpui.

TNT hian an match hmasa zawkah champion lai Chhinga Veng Spikers an hneh, tun ṭumah erawh an chungnung thei ta lo. Vanlalṭanchhana'n point 29 hmuin a thawhhlawk a, chakpui nan erawh a tawk zo lo.

Match hnih ṭheuh an khelh tawh chinah, vawi hnih chak tawh Hunthar chu hmahruaitu an ni. Tuichangral, TNT leh Durtlang North ten vawi khat ṭheuh hnehna an chang, champion lai Spikers erawhin chak ni hmel an la hmu lo a ni.

Mipa- May 12, Ningani
Tuichangral 3 -1 TNT
(25-21, 14-25, 25-21, 25-23)
D3 Business Player of the Night: Sahil Kumar, Tuichangral