Nadal a che fuh rei lo

Rafael Nadal-a hliam dam tawh mah se a la che fuh rei thei lo. Italian Open khelh laiah a match pahnihnaah a chak lo, world number 16 Denis Shapovalov lakah Nadal hi 1-6, 7-5, 6-2 in a chak lo.

Spanish star hian set khatna chu a thunun hneh hle, mahse set hnuhnung pahnihah erawh a service a hum thei lo. Kar hmasa khan Madrid Open-ah beisei a phak lo tawh bawk, tun hnaiah beisei a phak lo hle.

Kum 35 mi Nadal chuan, "Set hnihna bul ka ṭan chhe hle a, ka tho chhuak thei ta lo kha pawi ka ti hle," a ti. A ke hliam chuan a rilru a la luah thu a sawi a, chutihrualin hun rei vak lo hnuah ngai awh leh theih a inbeisei.

May 22 aṭangin French Open khelh a ni dawn. Tun chinah chuan Nadal hian clay court inelna lian hmachhawn turin inbuatsaihna a nei ṭha tawk lo. Paris khawpuiah erawh hliam a nei a nih ngawt loh chuan player dang daih a ni leh ang.

Inkhel dangah Novak Djokovic chuan Stan Wawrinka chu 6-2, 6-2 a hnehin quarterfinal a inhlangkai. Swiss star Wawrinka hi tun dinhmunah world number 361 a ni a, kum khat chuang hnuah pangngai takin tennis a khel ve leh chauh.

World number 1 Djokovic hian a match lehpekah chuan Felix Auger-Aliassime a hmachhawn ang. Inkhel dangah Canadian tlangval hian American player Marcus Giron chu 6-3, 6-2 in a lo hneh ve thung a ni.