Inter inkhel kan en ho lo ang - Pioli

AC Milan coach Stefano Pioli chuan Serie A nomawi inchuh boruak sanzia a hria. Pathianni zan dar 9:30-ah Atalanta an mikhual dawn a, zanlaiah Inter Milan chu Cagliari mualah an lenglut thung ang.

Milan hian an mikhual an hneh chuan point ngain an sang fal dawn; Atalanta hneh se, an elpui Inter Milan an chak zo lo a nih chuan Milan hi an champion dawn. Pioli erawhin an inkhelh tur chauh ngaihtuah a duh.

Italian manager Pioli chuan, "Atalanta nena kan inkhelh tur bak hi ngaihtuah a ngai lo. Kan result chu eng pawh ni se, a hnu lamah a huhoa Inter inkhel en a ni lo ang, kan match hnulama tih tur ruahman lawk a ṭul lo," tiin a ṭawng fimkhur hle.

Milan hian 2010-11 season hnuah Serie A nomawi an la chawi leh lo, kuminah hian remchang ṭha an nei mek. Champion leh champion loh chu an kuta awm a ni a, chetsual an duh lo ang.