Zaninah Bundesliga tawp dawn

14th May, 2022

Bundesliga-ah Bayern Munich champion tawh mah se chiang lo a la awm. Zanin hi Bundesliga tawp zan a ni a, Champions League khel tur bakah relegation playoff khel tur thlengin a hriat kim theih ang. Match pakua hi zan dar 7:00-ah vek an khelh tur a ni.

Lewy tawpna?
Bayern Munich-in Wolfsburg an hmachhawn dawn a, inkhel result hian nghawng a nei lo. Mahse tun season-a goal 34 khung tawhtu Robert Lewandowski chanchin erawhin ngaihven a hlawh. Polish striker hian June 2023 thleng contract a nei a, pawhsei a tum lo a, tun nipui bazarah Barcelona a pan a duh.

Amaherawhchu Bayern chief executive Oliver Kahn chuan, "Season khata goal 30-40 khung thei player hralh chu a atthlak khawp ang. Season khat chu a la cham dawn," tiin a sawi a, Lewy hralh ai chuan a thlawna chhuahtir pawh an pawi ti lo.

Hello, UCL
Champoins League khel turin Bayern bakah Borussia Dortmudn leh Bayern Leverkusen te an tling tawh. Hmunruak pakhat luah khat turin RB Leipzig dinhmun a ṭha, Leipzig hian relegate tawh Arminia Bielefeld laka point an hlawhchhuah chuan season tharah UCL an khel ang.

Leipzig an chak lo erawh chuan Freiburg tan UCL a la beisei theih ang. Freiburg hian Leverkusen an tlawh dawn a, UCL khel turin an chak ngei ngei a ṭul dawn a ni. Chutihrualin Freiburg bakah an hnuaia awm Union Berlin ten a chhe berah Europa Conference League an khel dawn a, Europa League khelhna chance sang tak an nei bawk.

Mangṭha Haaland
Borussia Dortmund-in an match hnuhnung berah Hertha Berlin an hmachhawn dawn a, Signal Iduna Park-ah Manchester City zawm tur Erling Haaland thlahna hun an hmang ang.

Kum 21 mi Haaland hian kum 2020 khan euro maktaduai 20 bawr velin Dortmund a zawm a, season thum chhungin Bundesliga-ah match 66 khelin goal 61 a khung. Inelna hrang hrangah phei chuan match 88-ah goal 85 a khung a, a goal record hi a ropui hle.

Dortmund manager Marco Rose chuan, "Erling hian min chhuahsan mah se Dortmund erawh a kal zel dawn. Chutihrualin Erling hian goal min pe a, tha hrui min pe a, chak duhna min pe bawk. Amah hi a la naupang a, hma la sawn zel ang," tiin striker ṭha chungchuang Haaland-a chanchin a sawi.