Real-in Levante an sawp

La Liga-ah champion chiang tawh mah se Real Madrid an inthlahdah phah lo a, an mikhual Levante chu 6-0 in an sawp - Vinícius Júnior chuan hattrick a siam a, Ferland Mendy, Karim Benzema leh Rodrygo ten goal khat ṭheuh an khung bawk.

Benzema-a'n tun season inelna hrang hrangah match 44 khelin goal 44 a khung tawh a, Real tan goal match 603-ah goal 323 a khung tling ta - Real tana goal khung hnem lamah Raul a tluk chiah a, Spanish club tana khung hnem ber Cristiano Ronaldo (450 goals) erawh a la hlat deuh.

Kum 21 mi Vinícius-an Real tana a hattrick hmasa ber a siam a, tun season-a goal 21 a khungna a ni. Luka Modric-a'n kum 36 mi ni tawh mah se a la tar lo tih a pholang bawk a, assist vawi thum a nei - James Rodriguez (2015) hnua La Liga match khata Real tana assist vawi thum nei leh thei hmasa ber a ni.

Real laka an tlawm avangin Levante an relegate a, La Liga inhamtang tura chak mamawh team hian match hnih khelh tur la nei mah se an tla chiang tawh - tun season Spanish top flight league aṭanga tla hmasa ber an ni nghal.