Chelsea ngam loh Liverpool an champion

February 27 zan khan League Cup final-ah Liverpool leh Chelsea an intawng a, minute 120 chhung goal a lut lo - penalty hmanga chak zawk zawn a ni a, Liverpool an champion.

May 14 zanah FA Cup final khelh a ni a, Liverpool leh Chelsea bawk an intawng. League Cup ang thoin minute 120 chhungin goal a lut lo - penalty hmanga chak zawk zawn a ni a, Liverpool bawk an champion leh ta.

Reds hian penalty-ah 6-5 in hnehna an chang a, Blues tan captain César Azpilicueta leh Mason Mount ten an pet goal lo a, Liverpool lamah Sadio Mane chu pet goal lo awmchhun a ni.

Liverpool-in Chelsea tlawm lai hmel an hmu nawn leh ta a, quadruple champion ni turin Premier League leh Champions League chiah an bak ta - thei tak ang maw?

Chance nei ve ve
Inrinni zana FA Cup final khelh a nih hmain Liverpool leh Chelsea hi tun season-ah ringawt vawi thum an intawng tawh a, minute 90 chhungin chak zawk an awm ngai lo.

FA Cup final-ah tun season-a a vawi li nan an intawng leh ta a, Wembley Stadium-ah inkhel a hmuhnawm - statistic aṭanga en chuan Reds an chungnung a, mahse, inkhel enin team pahnihin chak theihna chance an nei ve ve.

Liverpool tan khel ṭha em em mai Luis Diaz a hmuhnawm takzet a, Colombian forward hi a vanneih zan ni se goal khung thei a ni - woodwork a tih perte kha a ui vawng vawng ang.

Reds tan Andrew Robertson pawhin woodwork a tih per ve bawk a, Chelsea-in chance nei lo an ni bik lo. Marcos Alonso-a'n chance duhawm a neih bakah post a tih per a, Mount chuan a hun duhawm a hlah bawk.

Penalty chu
Minute 120 chhung goal a lut lo a, penalty hmanga chak zawk zawn a ṭul - League Cup-a penalty hmanga thinlung hliama lo awm tawh Chelsea fans thin a phu.

Chelsea-in pet hmasa zawkin Alonso-a'n awlsam takin a chhuih lut a, mahse, a vawi hnihnaa pettu captain Azpi-a'n post a pet per tlat!

Blues tan Azpi hnua pettu player pathumin an pet lut vek a, Liverpool player paliin an chhuih lut bawk - Sadio Mane a lo pen chhuak a, ram tana a khelhpui Édouard Mendy vena a pet goal chuan Liverpool an champion dawn.

Mahse, Reds player zinga tawnhriat nei ṭha ber pawl hian a chhuih lut lo - Mendy tana dan nuam tawk velin a pet a, 4-4 a ni!

A tawp hlimna
Liverpool fan-ten champion an lawm tawh dawn emaw an intih hnuah, an thiampuipa Mane-a'n a chhuih lut lo a, Kop hoin hlauthawng tak chunga penalty an thlir chhunzawm a ngaih phah.

Reds ṭantuten pawi ti takin an hmai an hup vawng vawng a, hetihlai hian Chelsea boss Thomas Tuchel chuan bawkkhup meuhin khelmual a chum a, beiseina a vul thar - hlimna leh lungngaihna inkar hi second tlemtê chauh a ni tih reng a ngaihtuah tawh lo.

Penalty an pet chhunzawm a, Hakim Ziyech (Chelsea) leh Diogo Jota (Liverpool) ten an pet goal leh hnuah Mount a lo pen chhuak a, Chelsea fapa duhlai pet hi Alisson chuan ṭha zetin a dang!

Boruak sang tak karah Kostas Tsimikas a lo pen chhuak a, Greek defender ṭha hi an inkhelh tam loh avangin zam pawh ni se a demawm loh - mahse, kum 26 mi left back hian boruak sang a ngam tih pholangin cool zetin a chhuih lut a, Liverpool an champion.

A chhehvel
Liverpool an champion a, an lawm erawh a kim lo - Mohamed Salah, Virgil van Dijk leh Andy Robertson te chu hliam vangin lakchhuah an ngai vek a, league match hnih leh Champions League final hmabak Reds tan chanchin lawmawm a ni lo.

Reds manager Jurgen Klopp-a'n VVD chuan a tihrawl a tihnat thu a sawi a, "Ngaihtuahawm a ni lo," a ti a, Robertson hi tha na vanga lakchhuah a ni bawk a, a serious lo tura ngaih a ni.

Minute 33-naa lakchhuah ngai Salah dinhmun erawh sawi chian theih a ni lo a, Egyptian forward hi Champions League final-ah a inlan thei lo a nih ngat chuan Liverpool tan a pawi thui thei ang.

European champion lai Chelsea-in player hliam sawi tur nei lo mah se, season thar atan inthuamṭhat an mamawh tih a lang a, tih tur tam takin club neitu thar a hmuak e.